Bicycle
A Akhtar Jawad
0
Altın Yaprak
Lehrati hui zulfien urta hua aanchal hay,
Ya sarv-o-sunoober per chaya hua badal hay,
Jhonkon se hawa ke kutch phaila hua kajal hay,
Do pahion ki gari per rangeen si halchal hy.
Yeh Indradhanuk hay ya bal khati hui shamsheer,
Yeh tairti hirni hay ya urti hui tanveer,
Dil bandh liya jisne woh behti hui zanjeer,
Do pahion ki gari per rangeen si halchal hay.
Pairahan-e-rangeen se ek jang hawa ki hay,
Har naqsh ujagar hay woh lakh chupati hay,
Aanchal ko pakar lena bas ek ada hi hay,
Do pahion ki gari per rangeen si halchal hay.
Main peeche laga hoon woh mur mur ke mujhe dekhe,
Rah jaoon jo peeche main hans hans ke mujhe dekhe,
Nazdeek jo aa jaoon ghusse se mujhe dekhe,
Do pahion ki gari per rangeen si halchal hay.
Sangeen safar ka yeh rangeen nazara hay,
Ang ang mein dawat hay aankhon mein ishara hay,
Jaise meri yeh shokhi usko bhi gawara hay,
Do pahion ki gari per rangeen si halchal hay.
Dhachke jo kabhi aayen woh uska saham jana,
Choraste ke majme mein dar jana woh ghabrana,
Chubhti hui nazron se sharmana simat jana,
Do pahion ki gari per rangeen si halchal hay.
Aankhon mein naye sapne lahrate machalte hayn,
Arman bhare do dil rahon mein bahakte hayn,
Khamosh takallum mein bhi do hont larazte hayn,
Do pahion ki gari per rangeen si halchal hay.
Nagah woh murti aur dekhti jati hay,
Jaise mujhe rahon per woh apni bulati hay,
Main aankh milata hoon woh aankh churati hay,
Do pahion ki gari per rangeen si halchal hay.
(In my old papers I got my oldest available poem written in my student life. This is how I started wring poems.)
Bu şiiri puanla
Henüz puan verilmemiş