Desgrazi de Giovannin Bongee

De già, lustrissem, che semm sul descors De quij prepotentoni de Frances, Ch’el senta on poo mò adess cossa m’è occors Jer sira in tra i nœuv e mezza e i des, Giust in quell’ora che vegneva via, Sloffi e stracch come on asen, de bottia. Seva in contraa de Santa Margaritta E andava inscì bell bell, come se fa, Ziffoland de per mi su la mia dritta, E quand sont lì al canton, dove che stà Quel pessee che gh’ha fœura i bej oliv. Me senti tutt a on bott a dì: Chi viv? Vardi inanz, e hoo capii de l’infilera Di cardon e del strèpet di sciavatt Che sera daa in la rondena, e che l’era La rondena senz’olter di crovatt; E mi, vedend la rondena che ven, Fermem lì senza mœuvem: vala ben?