Meneghin Biroeu

Bravo! bravo! l’ha faa propi polid A tœuss d’intorna quij bagaj; inscì Poss cuntagh ona scenna da fall rid, Che no la cuntarev se fussen chì: Che di vœult, nèe, già el sa.... se dis pû e men, E ogni busca per lor l’è on car de fen. Quatter ex-monegasc, sôr Benedetta, Sôr Anna, sôr Eusebia, e sôr Martina, Viven insemma, e fan tra lor casetta In cà d’on collaron della dottrina, Fœura di pee del mond, là passaa el foss Tra sant Vicenz di matt e sant Caloss. Paghen el ficc a furia de rosari, Gh’han el sò bon livell, gh’han la pension, Dò convers che je serv senza salari, La soa gesa lì arent voltaa el canton, El sò comed e el pozz denter de l’uss, La soa gatta e ’l stornell che dis: Esuss. De teolegh, de pret, de confessor. Tra quij che disnen dal padron de cà E tra quij olter che van sù de lor A portagh cott e cames de rizzà, Ghe n’han in frega tutt’el di on brovett. De podess consultà su tutt i pett.