Natan profetta (e questa, sur Abaa

Natan profetta (e questa, sur Abaa, L’è moral de la bona e de la bella) L’è andaa de David dopo quell peccaa Ch’el sa pœù lu, a cuntagh st’istoriella: David, giustizia! On ricch pien ras sfondaa De bè, de bœu, de becchi, de scarsella L’ha traa in setton de pianta on desgraziaa Robandegh ona poca pegorella. David, che l’eva on re puttost fogos, In dov’eel, el respond, sto becco etzettera, Ch’el poda fà inciodà sora ona cros? Bell bell, allora Natan el repìa, Manch fœugh, che a redú i coss propi a la lettera Ti te sec el ricch, e el desgraziaa l’è Uria. Istess cont uscioria Bajaroo on poo anca mi Natan nostran.... Come?... lu che l’è dent coi pee, coi man, Col coo, col fabrian In di rimm de Toscana, e ch’el ghe n’ha De fà lecc a cavaj, de impinn di cà, El gh’ha el coragg de fa La guerra a sti pocch nost dodes tomitt, A l’unega berina di Bositt? Lu, dighi, el gh’ha el petitt De sgognann, strapazzann, rompen la pippa? Che azion de porch, sur David de la lippa!