On striozz

Ona veggiana esosa, Spiossera, avara, tegna, pedocciosa, Che per cavà d’on pozz la cros d’on ghell L’avaràv faa la corda con la peli, L’andava d’on gran pezz fantastegand, Masnand e ruminand Come possè in don bott, Senza tanci cuntee, Deventà ricca e sgonfià su el bolgiott; E avend sentii a descorr come qualment, Gh’eva staa de la gent Che aveven ottegnuu sta sort de coss Con l’ajutt de quell angior di orecc d’oss, La s’è resolta anch lee De buttass a la sort e a la fortuna, E intant per scongiurall e fass juttà Dee a trà cossa la fà. (Ma ovej, fiœuj, che i coss staghen chì inscì Tra violter e mì! Che in pont de striament e malefizi Gh’è di œucc intorna, e bœugna avegh giudizi).