Killin’ Nanny

Two little pickny is watchin’ , While a goat is led to deat’ ; Dey are little ones of two years, An’ know naught of badness yet. De goat is bawlin’ fe mussy An’ de children watch de sight As de butcher re’ch his sharp knife, An’ tab wid all his might. Dey see de red blood flowin’ ; An’ one chil’ trimble an’ hide His face in de midder’s bosom, While t’udder look on wide-eyed. De tears is fallin’ down hotly From him on de mudder’s knee; De udder wid joy is starin’, An’ clappin’ his han’s wid glee. When dey had forgotten Nanny, Grown men I see dem again; An’ de forehead of de laughter Was brand’ wid de mark of Cain.