Cantica de Sserrana

Cerca de Tablada, la sierra passada, falléme con Alda, a la madrugada. Ençima del puerto cuydéme ser muerto de nieue e de frío e dese rruçío e de grand' elada. Ya a la decida dy una corrida: fallé una sserrana fermosa, loçana e byen colorada dixel' yo a ella: «Omíllome, bella.», Diz': «Tú, que bien corres, aquí non t' engorres, anda tu jornada.» Yo l' dix: «Frío tengo, e por eso vengo a vos, fermosura: quered por mesura oy darme posada.» Díxome la moça: «Pariente, mi choça el qu' en ella posa conmigo desposa e dame soldada,» Yo l' dixe: «De grado; mas yo so cassado aquí en Ferreros; mas de mis dineros darvos he, amada», Diz: «Vente comigo»; Levóme consigo, diome buena lunbre, com' era costunbre de sierra nevada. Diom' pan de centeno tyznado, moreno, diome vino malo, agrillo e ralo, e carne salada, Diom' queso de cabras: Diz: «Fidalgo, abras ese blaço, toma un canto de soma, que tengo guardada», Diz: «Uéspet, almuerça, e bev' e esfuerça, caliéntat' e paga de mal no s' te faga fasta la tornada. »Quien donas me diere, quales yo pediere, avrá buena çena e lichiga buena, que no l' cueste nada.» «Vos, qu' eso desides, ¿por qué non pedides la cosa çertera?» Ella diz: «¡Maguera! ¿Sy me será dada? »Pues dame una çinta bermeja, byen tynta, e buena camisa fecha a mi guisa con su collarada »Dame buenas sartas d' estaña e hartas, e dame halía de buena valya, pelleja delgada. »Dame buena toca, lystada de cota, e dame çapatas, bermejas byen altas, de pieça labrada. »Con aquestas joyas, quiero que lo oyas, serás byen venido: serás mi marido e yo tu velada». «Sserrana señora, tant' algo agora non trax' por ventura; faré fladura para la tornada.» Díxome la heda: «Do non ay moneda, non ay merchandía nin ay tan buen día nin cara pagada. »Non ay mercadero bueno sin dinero, e yo non me pago del que non da algo nin le dó posada. »Nunca d' omenaje pagan ostelaje; por dineros faze ome quanto'l plase: cosa es provada.»