Ad una Italiana

Quand lou Dante larguè soun obro magistralo, Creant, dins soun Infèr, lengo de Paradis, Es qu’avié de Prouvènço escouta li cigalo, Umble escoulan di troubadour, coume éu se dis. Se Petrarco dounè perlo e raubo pourpalo A la Muso italico en vièsti de cadis, Es qu’à Vau-cluso avié vist Lauro bloundo e palo, E la Sorgo inspirè si sounet cantadis. Païs de Gai-Sabè, de cèu blu, de jouvènço, En plen Age-Mejan Itàli ’mé Prouvènço Mesclèron soun parla, si cansoun, sis amour. O vous que reviéudas, au viéi passa fidèlo, L’amistanço d’antan, vous cantan, dono bello, Coume s’érias Laureto e nàutri troubadour. (Armana prouvençau, A. 1896).