आंनि अनजालिया बुङा

गोबाय खरलेब आयना एबा खंसा आयना नायै नायै आंनि अनजालिया रुजुवा गलाबजोँ बियो गावखौ रुजुवा मालथिजोँ। अखा दैस्लुंआव सिथर सेरै सेरै एबा मैसो गंनि खानजंजोँ गावनि खानाय खानै खानै आंनि अनजालिया सोङा- माबादि नुदोँ आंखौ? समायदोँ नङा आंखौ? आंनि अनजालिया गोबाया सियालनि हाबाजोँ बाना जानाय गुबुंले खुवा खुवा दैस्लुंनि अख्रांखौ। अदेबानि मोनसेल' मोखां अनजालिनि आं खुबैगारहरनो हाया। आरो आं बेसेबां बुंनो- दिनै मोजां नुदोँ दिनै मोजांसिन नुदोँ दिनै आरो मोजांसिनबाव नुदोँ मिथिगौ आंनि अनजालिया मिथिगौ। जेब्ला सिमलि थुलाया उरां-फारां बिरबायना लाइमोन बारदैनि मोदैजोँ गोदानै सिमलि बिफांनि महर होयो होनबासो खखिलानि मेथाइयाव बियो फैयो ना खुस्रानि जावरिनायजोँ। एम्बु हानजानि बेम दामनाइयाव गोजोँ खाफाल जारौ मान्दारनि फोथा लानानै दैज्लांनि गुरै गोरबोआव संसारजोँ गेलेनो।