आंनि खबाम

उदैनि खेँखायनायावनोथ' सान्दुंआ खामनो मोनो हालुवानि बिखुं। उखैनायखौ आरो सोरथो मानिहोनो हायो? बाख्रिनि माय दामोला एरा जामलाङोसो मोस्रोम उरि आरो इंगिनिनि उखैनांनायाव। आयनि फिसाख'निफ्राइ ओँखारबोनानै मोनबाय आं बुहुमनि मोदोमनाय अहंखार, थेवबो बिफांआव गाखोनानै सोरगिदिँ नायहरना रंजाखांदोँ गोसोआ बिफां बिलाइफोरबादि। गेलेनाय मेँनायनि सेरजोँनो बेसे बोहैलांखो दैसानि मिनिनाय उन्दुनाय सिरिमोन्नायनि बिखा गेजेरजोँ बारलांबाय बार। आंनि खाफालाव सौग्राव फैयो साननि दुंनाय हाबाब गोमालांदोँ आरो फैफिनदोँ लुबैनाय, बरनायख' हाया बिफांआव गाखोनानै लावखारनि सिफुं सुनानै गोजोन्नाय गोसो। जोमै गेजेराव थाखोमाना सोर फाग्लिया एसेबां गाबदोँ? बैसोमुथिनि गथ' सारिनो आयखां-बायखां जानाय समाव। दरबासि नोँ गाबदोँ इनजुर खना खना आफाखि सुस्रनो हायै मोदै फसरनानै, गोसोथोनायखौ मोनैनि दाहायाव गाबफ्लानाय अमासि नोँ मिथिगौ माब्लादि फैयो सान-हरा?