अखा- 04 मोला रायखसनि थैनाय

58 खबानि गोरलै फिसाखौ दावराइ जोलाया खांबाय। दाउस्रि रानिया फेदेरबाय अखा दोनबाय बिनि मुंखौ। 59 अखाया लासैनो गिदिर जाबाय आदार नागिरनानै जानो सोलोँबाय। बियो बिफां गाखोनानै बिफांनि फिथाइफोरखौ जानायसै। 60 अरननि मोख्राफोरजोँ गेलेनायसै मैदेर बिखुंआव गाखोनायसै। मुफुरजोँ बुलायनो सोलोँबाय सेसाफोरजोँ खारनाय बादिलायबाय। 61 अरननि अमाफोरखौ गुमबाय बियो अरननि मै मोसौफोरखौ गुमबाय। दावराइ आरो दाउस्रिमोना अखाखौ रायनो फोरोँबाय। 62 दावराइ जोलाया अखानो मोला रायखसनि सल' खिन्थाबाय। अखाया खोनानानै थोर थोर मोला रायखसखौ बुथारनो सानबाय। 63 सानसेखालि मासे बुहुत जानानै मोला रायखसा मन'नो होसोबाय। अखाया बिजोँ बुलायबाय उनाव रायखसा अखाखौ मन'बाय। 64 रायखसनि उदैया दुंखावनायसै बियो सहायनो हायै जाबाय। जेरैनो एरैनो खारबाय बियो मोनसे दैयाव बियो बाज्रुमबाय। 65 उदैया अब्लाबो दुंखावथारबाय बियो बोरियाव गाखोफिनबाय। उनाव अखाखौ गोबाफिनबाय आरो अखाखौ नायहाब्बाय बियो। 66 अखाया रायखसजोँ बुलायफिन्नायसै रायखसा फिन मन'बावबाय। बिनि उनाव बेबादिनो गोबाफिनबाय अखाया आरो बुलायफिन्नायसै। 67 उनाव रायखसा मेँग्लिनायसै अखाया रायखसनि हाथाइयाव हमबाय। बिनि उनाव हाथाइखौ सिफायबाय उनाव मोला रायखसा थैनायसै। 68 सोर्गोनिफ्राय फ्रि फ्रि अखा हाबाय अरननि जुनारफोरा रंजाबाय। दाउसिन-दाउला मेथाइ रोजाबनायसै अरनाव रैसुमै मेथाइ रिँनायसै। 69 अख्रांआव जोमैया बिबार जाबाय अरनाव समायना बिबार बारबाय। बिफां-लाइफांआ मोसाबाय खोलो खोलो बार बारबाय। 70 दाउस्रि रानिया मेथाइ रोजाब्बाय- उदां जाबाय गिनांगौ गैलिया। मोला रायखसा थैबाय जिब-जुनार उदां जाबाय। 71 हाजोआव बिबार बारबाय अरनाव गोजोन अखा हाबाय। बयबो रंजादो खुसिजोँ बेसेबा गोजोन बार बारदोँ। 72 सोर्गोनिफ्राय हामलायनाय फैदोँ बाखोनायदो अखा जोहोलावखौ। बिरलांबाय रायखसनि जिउआ बिनि सह'जोँ बिफांआ रंजादोँ। 73 खुसियाव उदां जाबाय अरना बयबो दिनै खौसेथि जाबाय। बायसबाय रायखसनि हाथाइया रायखसनि उदैनिफ्राय बयबो रैखा मोनबाय।