अखा- 07 बुदर राजानि खुद्रिनाय

131 अरननि बिफां सासा बिरनानै मोसौ बलदनि गारिया सफैबाय। सानै फलाना राजानि आथिँआव गोग्लैबाय बिसोर राजाखौ खुलुमना बुंनायसै- 132 महाराजा सख्ल-मेख्लआ थैबाय अरननि लान्थिया जोहोलावा बिसोरखौ अन्थाइजोँ खुबैथारबाय अरथारबाय अरननि मोसा फालोआ। 133 हे महाराजा लान्थिया जोहोलावा ओरैबायदि बियो सियानदि- जोँ बिखौ होसोबाय जोँनि गासैखौबो मोसाया बारसिनबाय। 134 अरननि जिउ-जिबिया बेसेबा ओरैबायदि खौसेथि जाबायदि- बिसोर जोँखौ गाग्लोब्बाय आरो जोँ फिन खारबोनो नांबाय। 135 बुदर राजाया रागा जोँखांनायसै बियो ओरैबायदि जोँबायदि गावनि बान्दिखौनो थाव सोबाबाय लोगो लोगो बान्दिया सैमा जाबाय। 136 सैमाया राजानि आफाखि सोलाबाय बियो फलानफोरखौ सोँख्रावबाय। फलानफोरा ओरैबायदि गिबायदि बिसोर खारनानै बिमा दैयाव बाज्रुमबाय। 137 बिसोरखौ बिमा दैनि दाहारा खोला फारसे बोलांबाय। दैमानि गुथाला बिसोरखौ मनबाय दैमानि नाया ओँगो सेलायबाय। 138 राजाया खुद्रिनानै सानथ्रि लेँहरबाय दजनसे सानथ्रिफ्रा खुलुम फैबाय। सानथ्रिफोरखौ थांखिनानै राजाया बुंनो हमबाय- 139 नै आंनि मेंनोरोङै सानथ्रिफोर लावख्रि अरनखौ गाग्लोबहै। अमा आरो मै गावनानै लाबो लांथिया जोहोलावखौ फेजेनथार। 140 बिथोन मोन्नानै सानथ्रिफ्रा थांबाय मोसौ गारियाव गाखोबाय। मोसौ बलदा गोख्रै खारबाय बिसोर लावख्रि अरनखौ मोनहैबाय। 141 हानजा हानजा सानथ्रिफोरा दुगाजोँ अरनाव हाबबाय। अरननि गासैबो सोमोनांबाय दाउसिन जिउ-जुनारा गाबख्रावबाय। 142 राजानि सानथ्रिफ्रा दुगाजोँ ओरैबायदि जिलिद गावबायदि बिरग्लांबाय दाउसिन दाउला खारबाय अरननि जिब-जुनार। 143 सानथ्रिफ्रा आरोबाव जिलिद हगारनायसै रोजा रोजा जुनार थैनायसै। अरननि गासैबो गाबख्रावबाय सानथ्रिफ्रा मोसौ गारियाव थिखोबाय। 145 ओजोँ दाउस्रि हाजि मासेया अखाखौ नागिरना बिरलांनायसै। हां गहां मेँनायजोँ लोगो मोन्नायसै बियो अखाखौ बुंनो हमबाय- 145 अरनखौ बुदर राजाया गाग्लोब्बाय बियो अरनखौ फोजोबसिगोन। दाउसिन मि जुनार थानाय नंला लावख्रि अरना थानाय नंला। 146 बिसोर ओरैबायदि अखानि जिलिद गावदोँदि दाउसिनफ्रा गांखं बुब्राबनो हायाखै। जुनारफोर खारनानै गनो हायै बिसोर जे बान गावदोँ। 147 बिसोर ओरैबायदि सियानदि जुनारफोरा थाखोमानो हायाखै। दाउसिनफ्रा जोमैयाव एब्रेनो हायाखै बिसोर जोमै बुस्रांनाय जिलिद गावबाय। 148 बिसोर ओरैबायदि गोहो गोनांदि अमाया बिसोरजोँ अरलायनो हायाखै। मोसाफ्राबो बारसिननो हायाखै मोख्रा मैदेरमोना अन्थाइजोँ खुबैनो हायाखै। 149 बिसोर ओरैबायदि अन्थाइ बिखादि रोजा रोजा जुनारखौ गावथारबाय। रोजा रोजा दाउसिना थैबाय लांबाय अमा फिसाखौ बिसोर। 150 बिसोरनि गोहोखौ नुनानै आवजार दाउदै बिबार सिरिबाय। जाहाब मान्दार बिबार सिरिबाय गाबबाय बिफांआ गिनानै। 151 नै जोहोलाव बिसोर अरनखौ लान्दा खान्दा खालामसिगोन। बिसोर अरनखौ एवस्रांगोन हे जोहोलाव फेजेनदो बिसोरखौ। 152 अरना हांगार जासिगोन अरननि गासैबो हाथफ्ला जासिगोन। बिसोर अरनखौ सावसिगोन लावख्रि होन्नाय अरना गोमोरसिगोन। 153 बेबादि बुंनानै दाउस्रिया गावनि बिखुंआव अखाखौ लाबाय। बियो लावख्रि अरनाव बिरलांबाय अब्ला बिसोर नुहरबाय- 154 राजानि सानथ्रिफ्रा थांबाय बलदनि गारिया गोख्रै खारबाय। अरननि बिफां सासा गोमा हैबाय जोमै सिङाव।