अखा- 09 लायदर अरनाव थांनाय

167 लावख्रिया गोथै सह' जानायनि उनाव अखानि दुखुआ बांनायसै। बियो बा सान बा हर जाया लोङा थानायसै। 168 बैसागुआव जिब जुनारा रंजायाखिसै देग्लाय अरनाव अमासि। फुर्णिमायाव अखाफोर नुजायाखिसै अरनाव गासैबो दरसि दरसि। 169 बयनिबो गाबनाय दुखुजोँ देग्लायनि बैसागुआ थांबाय। दाउसिनफ्रा दुखुनि देँखो बोदोँ जुनारफोरा दाहानि गारां हगारदोँ। 170 मुलुगा बेसेबा मिनिनाय गैयै बयनिबो गोसोनि दाहा मेथाइजोँ। बयबो रोजाबदोँ जेन्नायनि मेथाइ थैबाय थैबाय गासैबो जिउआ। 171 बैसागुआ थांनायनि उनाव अखाया हाजो बेरायनो सान्नायसै। दाउराइ जोलाया बिखौ बुजायनायसै दाउस्रि हाजिया उनाव बुंबाय। 172 ''जोँ लायदर अरनाव थांगोन बेयाव निलु बोरायखौ लोगो हमगोन। बियो बुदरनि गोहोखौ मिथिगौ जोँ दानिया बेखौ लोगो हमनो हागौ।'' 173 सानसे बिसोर लावख्रि अरनाव गिदिँबाय गोथै जुनारफोरखौ फबबाय। अन्थाइजोँ होसिन्नाय जानायसै गोथै दाउसिनफोरखौ फबनायसै। 174 जेनिबो गोहो गोनांसिन सान जोँमाखौ खुलुमनायसै। बिसोर खौसे गारांजोँ बुंबाय ''बयनिबो सोरांआव साखि जादोँ।'' 175 बिनि उनाव बिसोर थांबाय थाख्लाय दैमाखौ बारलांबाय। लायदर हाजोखौ मोनहैबाय मोनाबिलि समाव निलुखौ लोगो हमबाय। 176 हराव बिसोर सावरायबाय निलु दाउसिनजोँ अखानि सिनायथि जानायसै। निलुआ जोबोद अनखांनायसै बियो हाजासे गाबनायसै। 177 बियो ओरैबायदि गाबनायसैदि बिनि मेगननिफ्राय दैसा बोहैनायसै। बियो ओरैबायदि बोहैनो हमनायसैदि दैसाया जोबोद दाहार जानायसै। 178 अन्थाइफोरा मोदैजोँ गलिनायसै बिफां-लाइफांआ बाज्लखांनायसै। बन्थ बिलाइफोरा गोजावबाय ओरैबायदि समायना दैसा जाबाय। 179 दैसा सेराव मैगं रजनायसै इलांसि सिब्रुआ बिबार बारबाय। सिबुं आजोनाय रजबाय बिसोरबो बेसेबा समायना जाबाय। 180 निलु बोरायनि गाबनायजोँ बयबो गाबनायसै रोजा रोजा। सोर्गोनि सिख्लाफ्रा गाबनायसै जोमैनि रायजोफ्रा गाबनायसै। 181 अबंलावरिया बेसेबा गाबबाय अख्रां रायजोनि गासैबो गाबबाय। मोदैजोँ जुब जुब अखा हानायसै मुलुगा दैज्लां जानायसै।