अरननि दाइरि 1.07 थाइगिर दैसानिफ्राइ

92 सानजानि जोँमा साना बिखुं मोनबाय सहायनो हायैबादि बेसेबा, सान्दुंआ थिँ थिँ दुंस्रेमथारदोँ अरननि बिफांफ्रा लह्रायदोँ। 93 मेंरुनाय आरो लोरला देहायै थाइगिर दैसानि आफांआव, सिनारि अरननिफ्राय सासे फलाना दै लोँफैदोँ जोबोद बोलो गोरा फलान। 94 ग्रद ग्रद दैखौ खुगा सोमब्रनानै गांगाजासे लोँखांनानै फलाना, बियो गावनि मोखांखौ सुदोँ गोगो दैयाव गावखौ नायदोँ। 95 बिनि उनाव बियो गावनि गुलि जलंगा आरो सिलाइखौ, दैसानि बोरियाव आलांगायै दोनदोँ गावनि लंफेनखौ खुनानै जांगोन गोजायै दुगैदोँ। 96 दैसानि बिखायाव लोहाबनाय समावनो सोरनिबा दखनाया लांगायै, फलाननि मोखांआव खोबलोब फैबाय नायबाय बियो सोरनिबा दखनामार। 97 नुनानै गोसोजोँ गोसो सानबाय बियो ''बेबादि गुदु अरननि दैसायाव, सोरबा सिख्लानि दखना! '' दखनाखौ मोनामसुबाय फलाना। 98 गोसोजोँ गोसो आरोबाव सानबाय- ''जानो हागौ सोरबा सिख्लाया बे दैसानि खर'आव दुगैदोँ मोजांनि बाथ्रायानो जादोँ। 99 रावबो गैयै बे अरनाव- दिनै मोजांनि खाबु, दिनै खाफाल मोजां सान आंनि थाखाय थांनि आं गोख्रैनो।'' 100 बेबादिनो दैसानि खर'फारसे दावखो लांबाय गोख्रै फलाना, जब' जब' दैसानि बोहैबोनाय फारसे आथिँ गासोम गासोम खुसियै। 101 फलाननि फैनायखौ नुनानै दैसायाव दुगैबाय थानाय, हानजासे सिख्लाफ्रा स्रोब गोमोरलांबाय रुम्बांआ जोबोद सोमोनांबाय। 102 गावदि लंथं जाबाय अब्लासो हमनो हाबाय बियो, गावनि दखनाखौ नागिरबाय बियो लोगो लोगो मानसिखौ नुबाय। 103 मानसिया जांगोन गोजायै गावनि फारसे दावगाबोबाय, खाथियाव सफैथारबा गिनाय लाजिनायजोँ दैयावनो गोजोमनानै थाबाय रुम्बांआ। 104 फलाना मिनिसुलु मिनिबाय खुदै ग्रद मननानै बुंबाय बियो- ''एसेबां समायना सिख्ला बे अरननि गेजेरनि दैसायाव। 105 दिनै खाफाला जोबोद मोजां आंना मैबो मोनाखिसै अमाबो गैया, गुलिया फेरनै थांबाय ओरैनो ग्रोब खहा सुफुंनो सिख्ला मोनबाय।'' 106 रुम्बांआ जोबोद गिनायजोँ बुंबाय- ''सोर नोँ? अन्नानै आंखौ रैखा खालाम! आंनि दखनाया आफांजोँ गोजाव लांबाय।'' 107 फलाना गोदै खेबसे मिनिगारबाय बिनि उनाव बुंबाय बियो- ''रैखा खालामगोन सना नाथाय नोँ गावनो आंनो गथायग्रोदो। 108 फै समायना आंनि सेराव बेबादि दैसा गेजेराव जाया, सिखार सना गसं गसं फै दैसानि मारुंआव थांनि-'' 109 रुम्बांआ जोँखांनानै बुंनायसै- ''गुण्डा लाजिनाय गैयै बेबादि बाथ्रा दाबुं नोङो आं जोबोद गिदिर खैफोदाव गोग्लैनानै दं। 110 बेबादि समाव आरोबाव खैफोद मिथिगौना नोङो? खैफोदनि बेबादि समाव रैखा खालामनायासो मानसिनि घोरोम। 111 फलाना आरोबाव मिनिनानै बुंबाय- ''सिखार आरो मैहुर खालामनाय, बिनि थाखायनो आंनि जोनोम सिखार सना आंनि जिउ। 112 बेबादि अरन गेजेराव सासे सिख्लाखौ हार्सिँङै लोगो मोनब्ला, बोलो गोहो गोनां सोर सादु? सोर फलाना गोसोखौ दबथाय हायो? 113 आंथ' सादु नङालाय सना आंहाथ' आरो घोरोम गैयालाय, आंबादि सासे फलाननियाव मोजां घोरोम बोजोँनिफ्राय फैनो? 114 इनाय आरो अगेन हाबा मानसिनि बायदि जिउ जुनारनि, मैहुर खालामनाय गावथारनायानो आंनि दिनैनि घोरोम।'' 115 जोमै दाफबनाय मोखां गिलिर खैफोदनि गिनायजोँ, रुम्बांआ दैसायाव गोजोमदोँ बियो दैसानिफ्राय सिखारनो हाया। 116 गिनाय आरो लाजिनायजोँ रुम्बांआ गाबफ्रामना बुंबाय- ''अन्नानै बेबादि दाख्लाम आंखौ! अरननि जुनादानो आंखौ बेयाव लाबोदोँ। 117 आं दा खारखोमानानैसो लामा आन्दायना बे दैसासिम सफैदोँ, नोँ आंखौ रैखा खालाम नोँनि गोबां मदद खालामगोन। 118 ''हा हा हा- सनालै नोँनि सल'खौ आं खोनासंलिया, फै आं सेराव गोसो गोजोन होग्रा बै मारुंआव आं नोँखौ लांनि। 119 सानैजोँ जिउनि गोजोन्नाय लानोसै बिनि उनाव आं नोँखौ, उदाङै हगार हरगोन सना फै सना सिखार दैसानिफ्राय।'' 120 सिरिया रुम्बांआ रागा जोँनाय आरो बेसेबा गिनायजोँ, दैसानिफ्राय मारुंआव गाखोनायसै फलाना बिनि उनाव थांबाय। 121 मारुंआव थाइगिर फिथाइ थायसे मोन्नानै फलाना मारुंआव गाखोहांब्लानो, खर'आव थांखाव खुबैनानै खारबाय फलाना दैसायाव फोद्धा खांग्रांनायसै। 122 हाग्रा हाग्रा रुम्बांआ खारबाय मारुंआव गाखोफिन्नायसै फलाना, रुम्बांआ खारबाय फलाना होलांनायसै हाग्रा अन्थाइ फिउ फिउ बारलांनायसै।