अरननि दाइरि 2.02 लायदर दैसानिफ्राइ

211 खौऔ खौऔ दाउ खौऔ गाबदोँ जेरैबो दाउसिननि बायदि गारां, रैसुमै मासुमै सन्दे-बन्दे रिँदोँ बेसेबा खुसि बिफांनि बिलाइ बारजोँ। 212 सिगुण हाजोखौ बारनानै बिसोर दानिया फिसा लिँलिँ गोजौ, मोनसे लामाजोँ मानखोबाय बे हाजोनि मुङानो लायदर हाजो। 213 हाजोआव मानखो जेन्नायनिफ्राय हाजोनि दुलाराइ थिखिनियाव, बेयाव लायदर बिफांआ बांसिन बिसोर थिखिनियाव फिनखोबाय। 214 हाजो थिखिनि मोनहैयोब्ला सिरिया रुम्बांआ दोखो मेंग्लिबाय, बेसेबा गोजोन आरो खुसियै अरना खष्टयै बोखो लांदोँमोन। 215 हाजो थिखिनिफ्राय रुम्बांआ नायहरबाय रिउ रिउ बेसेबा गोथौ मुलुगखौ, नाथाय बेसेबा समायना मुलुग सिनायहरनो हाया हाजोनिफ्राय। 216 नायहरै नायहरै खर' गिदिँनाय मोनबाय बियो आरोबाव नायनो हायाखिसै, रुम्बांआ दान्दिसे जिरायबाय सोरगिदिँ गोमोथाव नायहरबाय। 217 बिनि उनाव बिसोर दै गांबाय लायदर दैसासिम नागिरना सफैबाय, जोबोद लेथ्रा मोनसे दैसा मेगनजोँ नायबाय थानो हाथावै। 218 लायदर हाजोनिफ्राय बोहैना खोला फारसे सुज्राय बिलोआव लोगो लाहैनाय, लोँजानाया गोजाननि बाथ्रा नायनोनो हायाखिसै रुम्बांआ। 219 दैसाखौ नायनानै अरननियाव सोँदोँ बियो- ''जोँ दा बे दैखौनो लोँगोन? '' दैसा फारसे आवगाय लांबाय अरना उन उन रुम्बांआबो थांफाबाय। 220 गोसोजोँ गोसो रुम्बांआ सानदोँ- ''मानसिया बेबादि दैखौ लोङो? बे दैखौ लोँस्लाय स्लाय गावनि हासुदैखौनो लोँगोन आं।'' 221 जेब्ला अरना दैसायाव आथिँ गासोमदोँ रुम्बांआ सोँदोँ- ''नोँ बे दैखौनो लोङो नामा? एफा लेथ्रा दैखौनो? '' 222 अरननि बेसेबा उन जादोँमोन रुम्बांआ अरना उल्था फैफिन्नानै, रुम्बांखौ आखायाव हमना बोलांदोँ रुम्बांआ बाबांसिन थांफादोँमोन। 223 लायदर दैसाखौ बारलांनानै दानिया बिसोर मोनसे दैसा मोनहैबाय, बेसेबा गोजोँ गोगो दैसा बियो गिरि दैसा बिनि बुङा। 224 दैसाखौ नुनाय लोगो लोगो रुम्बांआ जोबोद खुसि जाबाय, बेसेबा खुसिजोँ आरो दैसानि सेराव गोर गोर खारलांबाय। 225 गांगाजासे दैखौ खुगा सोमब्रनानै ग्रद ग्रद लोँबाय बियो, गावनि मोखांखौ सुबाय आरोबाव बथलाव सोनानै लाबाय। 226 गिरि दैसानि सेर सेर बिफां-लाइफां बेसे समायना, बैसागुआ सफैनायखाय दिनै सोमखोर समायना महर लादोँ। 227 बिफांनि दालाइयाव बायदि दाउसिना समायनायै बानानै थादोँ, रुम्बांखौनो गल' गल' नायहरदोँ खायसे मुसुरदाव हरदोँ खुसियै। 228 दै लोँखांनानै अरनमोना खुसियै फांसे बिफां सायायाव जिरायबाय, बेसेबा सिउ सिउ बार बारदोँ गोजोन आरो खुसि अरना। 229 बे समाव साना थिखिनि मोनबाय सिरिया रुम्बांआ उखैबाय, उखैनायखौ सहायनो हायैबायदि मोनबाय बेसेबा उसु-खुथु जाबाय बियो। 230 उनथाराव अरनखौ बुंबाय- ''आं जोबोद उखैबायमोन! बहा मा मोनजाबावनो? आं सहायनो हाथारलिया। 231 आं आरो बेबादि बेसेबां सान हर उखैजाबाय थानो? नोँ आंखौ मिनिसिरि दैसायाव दोनलां बेनो मोजांसिन जागोन। 232 नोँबो आंखौ बेसेबां जोथोन लानो? आं सासे हिनजाव मानसि, आं दोनलांफिनदो अन्नानै आं नोँखौ साबायखर होगोन! '' 233 बेसेबा अनथाव बाथाव जादोँमोन रुम्बांनि ओलैस्रो गारांआ, बिनि अखाफोर बायदि गावदां गोरलै आरो गुरै महर मुस्रिया। 234 उनाव मोनसे सान्नायसै रुम्बांआ आरो बुंनायसै बियो- ''थां नोँ आंनो जानाय आदार नागिरना लाबोदो अन्नानै। 235 आं बेयावनो थाबाय थागोन आं जोबोद मेँबाय, आरोबाव थाबायनो हालिया आं जोबोद उखैनाय मोनबाय।'' 236 लोगो लोगो अरना खुसि जानानै लायदर हाजो फारसे गोख्रैयै, गुबुन मोनसे लामाजोँ गाखोलांनायसै रुम्बांआ खुसियै नायहरबाय।