अरननि दाइरि 2.08 मैदेर थैनायनिफ्राइ

392 सानजौफु समाव निलु दैसायाव गोबां फलानफ्रा दै लोँनो फैयो बे समाव दैसानि सेर सेर सिलौरानि रंजानाय फोरबो जायो बालाबारियाव 293 सिलौरा हमनो बे समाव सिगुण हाजोनिफ्राइ हानजा हानजा बावनासाफ्रा मिनि खुसि ओँखारबोयो बिसोर सिलौराखौ हमना लाङो। 394 दिनै गोगो निलु दैसायाव सास्नि दैसायाव सास्नि फलानफ्रा मेंग्लिनानै सफैयो बिसोर गावसोरनि मोखां बावसानि गोबां हानजाखौ नुनानै सोमोनांदोँ। 395 बिसोरो गावसोरनि गादा सालाइखौ फाथिना फेरसे गुलि गावनानै होबाय लोगो लोगो बावनाफ्रा लामफोथा खांग्रां-खुग्लुब अन्थाइफोराव सौथुलायनाय खारबाय। 396 दुखुनांथाव गिनानै खारनायाव जोनोम जागोदान बावनाया फिसा थालांदोँ रिउ रिउ गाबनायाव फलानफोरा बिखौ गावसोरनि जलंगायाव सोना लानानै थांदोँ। 397 हराव आहार उखैनायजोँ बेसेबा रिनदाव रिनदाव गाबदोँ बावनासा फिसाया, बावनासानि हानजाया नागिर नागिर फलाननि थानाय खुलिसिम सफैबाय। 398 बिसोर बंफांआव गाखो गाखो रिनदाव रिनदाव खायसे गाबदोँ खायसेबा जोबोद रागा देखायदोँ बिसोर जोबोद उपुद्रुद खालामबाय। 399 अब्ला फलानफ्रा बंफां गोजौआव गोदो गोदो बैसां सायाव उन्दुलांदोँमोन उनाव जेब्ला सिरि मोन्नानै नायो बिसोर बावनासानि खायसोखौ नुयो। 400 फलानफोरा बावना फिसाखौ जेब्ला हायाव गोख्रैयै गारना हरो अब्लासो मोदै हुगार हुगार सान मोखां बिसोर थांफिन्नायसै। 401 उन्दुलांनाय अरननि जिब-जुनारफोरा जेरैबो बयबो सिरि मोन्दोँ, मोसा-मुफुर सियाल गासैबो जाय फारा-फारि रागा जोँख्रुबदोँ। 402 रागाजोँ ग्रोम ग्रोम फैनानै फलानफ्रा उन्दुनाय बंफांखौ लोहो लोहो सोमावफैदोँ मानै मैदेरा जेसेबां हायो बिसोर बोलो होनानै। 403 अब्ला फलानफोरा गिनानै सिलाइजोँ गुलि गावनो हमबाय बिसोर मासे मैदेरखौ गावथारनानै खोमसि खोमसि खारलांबाय। 404 गोदो गोदो उन्दुलांनानै दंमोन रुम्बां आरो अरना गोजोनै बिसोर हरखाब सिरि मोन्नायसै जेसेबां हायो मैदेरनि गाबनायजोँ। 405 नाथाय रुम्बाङा हमथाना लाबाय अरनखौ बियो थांनो होआखिसै मोदैजोँ बिसोर जिरायना थाबाय लासै लासै खोमसिया खारलांनायसै। 406 मैदेर फालोनि दिखारनि गाबनायजोँ अरना गोमखांबाय हब्रानायाव गोथै मैदेरखौ बेँखनफैबाय अरननि गासै जिब-जुनारफोरा। 407 फुंनि साना नुजागोन नुजाया अखा दोमैलुलु बोथोरा जेरैबो बिफां-लाइफांआ गोमजोर रावनिबो मोखांआव गैया मिनिनाय। 408 अरन आरो रुम्बांजोँ फैनानै मैदेर गोथैखौ नुफैनायसै बिसोरनि मेगननिफ्राइ मोदै गबाय अरना दुखुजोँ गाबनो हमनायसै। 409 अख्रांआव बिरदाव बिरदाव दाउसिनफोरा मेथाइ रोजाबदोँ दुखुनि मोसा-मुफुर गासै जुनारफोराबो बाहागो लाफादोँ समानै दुखुआव। 410 सोरगिदिँ मैदेरखौ बेँखन्ना लानाय गासै जिब-जुनारफोरा अरननो लामा हगारना होनायसै अरना मैदेरखौ गोबाना गाबबाय। 411 रुम्बांआ गाबबाय अरनखौ बामख्रबना बिनि दाहा बयनिबो दाहाजोँ अख्रांनिफ्राय गोग्लैबाय जाख्रिसे अखा दान्दिसे बयनिबो मेगनजोँ मोदैजोँ। 412 बिफां-लाइफां जिउ-जुनार अरना अखाजोँ स्राय दुगैबाय सानसे दिनै दाहाजोँ बयबो जानाय आदारनि रसा नांबाय। 413 अरननि मोख्राफ्रा बन गोरान नागिरबाय बयबो गंफा गंफा लाबोबाय मोनाबि समाव मैदेरखौ सावबाय अरना ब्लाव ब्लाव खामनायसै। 414 जेरैबो लासै लासै अरनि उखुन्दैबादि बुहुमा खोमसि जाबोनो हमबाय अरन आरो सिरिया रुम्बांजोँ उन्दुग्रा थावनिसिम सफैबाय। 415 अरना गाबदोँ दाहा लानानै बिनि मेगनजोँ मोदैया बोहैदोँ सिरिया बिखौ हाजासे बुरखायबाय हराव बिसोर उन्दुलांबाय।