अरननि दाइरि 2.10 रुम्बांआ आर'ज खालामजेन्नायनिफ्राइ

441 अखानायै फुंआवनो सोरांनाय लोगो लोगो सिरिया दैसायाव फैना दुगैबाय दैसानिफ्राय लुन लुन खुवा खुदोँ खफ' जानानै अख्रांआव बिरलांदोँ। 442 नायनो समायनायै हांसो सिलारिमोना दैसायाव फालो फालो गेलेदोँ, आरो हानजायै दैसायाव सानस्रिदोँ दैसानि सेराव गेवलां-गेवथां बिबार। 443 सिरिया दुंबुर दैयाव स्राय दुगैखांनानै सानजानि जारौ गुरै मोखांजोँ लासै लासै ओँखारबोनाय ददेरे सानखौ गोसो गेवलांङै नायहरना खुलुमो। 445 बियो साननिथिँ मोखां जानानै आखाय खबजबनानै बिखौ बुंहरो- ''नै जोँमा नोँबादि सोरां खालामदो बे आंनि गासै गोरबोखौ। 446 बे मुलुगनि गासैखौबो बुजिनो हानाय राव गोरोँ खालामदो अरनखौ नोँखौ खुलुमो आरो खुलुमबाय थागोन राव रायनो थाखाय आंनि अरनखौ। 447 हे जोँमा आंनि रजेखौ नोङो अराय गोहो गोनां खालाम, मुलुगाव जेरै बुजिलायनाय जायो बयखौबो बुजिनो गोरोँ खालाम। 448 अरननि गोरबोखौ बुजिनो हाया आं बिनि खुगायाव राव रायनो फोरोँ, आंनि खाफालखौ आं बुजिबाय आं बबाखौनो जिउनि खालामबाय। 449 आंनि अरनखौ राव रायनो हो नङाब्ला आंखौबो नोङो बबि खालाम, जोँमा नोँनो बयनिबो गियानिसिन नोँनो बयनिबो जोँथिसिन। 450 नोँबादि रावबो सोरां होनो हाया मेगनखौ बेखेवो नोँनो जिबिनि, गियानखौ होयो नोँनो जिउनि होदो रायनो गियान रजेनो। 451 आंनि दुखुआ बेसेबा दुखु आय' आंबादिनो आंनि रजेया जानायमोनब्ला जोँमा बेसेबा गोजोनगौमोन आं अरननि गोरबोआव थादो नोङो गसाइ! '' 452 बेबादि बुंनानै सिरिया दलरै आर'ज गाब्बाय थायो गुरैयै, एसेयावनो अरना नागिर नागिर सफैयो सिरियै रुम्बांनि सेराव थाफैयो बियो। 453 सिरियानि आर'जा आवबा जायो बेसेबा खुसि आरो मोजाङै बियो अरननि मोखांखौ गावनि गुरै आखायजोँ बिलिर बिलिर सुनानै होयो। 454 बिनि उनाव बिसोरो खुसियै दैसानि सेरावनो गोजोनै जिरायो, हाजोनिफ्राय स्राय स्राय बोहैबोनाय दैसाखौ बिसोर सानैबो समायनायै नायहरो। 455 फुरहाबना थायो दैसा सेरसेर बिफांनि दालायाव दाउब' फालो, बिसोर नायहरो आज्लंनानै बहाबा मेथाइ रोजाबो दाउसिन फालो। 456 जोबोद गोजोन आरो सुदेम खोलो खोलो बार बारनो हमो, अरना साननि रैरुब बिलिरनायाव गेवलां महर लानो हमो। 457 जोबोद खुसिजोँ रुम्बांआ नायहरबाय बियो अरननि मोदोमाव आखाय होना बिनि मेगनाव नोजोर होबाय आरो मेगनखौ बोखार फिनबाय। 458 माबा हांखुर जानानै सिरिया लासै लासै अरनखौ बुंनो हमबाय- ''अरन जोँ सानैजोँ रायज्लायनो हानायमोनब्ला आरोबाव बेसेबा मोजां जागौमोन। 459 अरन बे अरननि सल'खौ आं नोँनिफ्राय सोंना लागौमोन, नाथाय राहा गैया जाबाय बे अरननि गासैबोदि नोँबादिनो जाबाय। 460 आं मिथिनो जोबोद लुबैयो नोँनि जिउनि सल'खौ रजे, बे अरननि गासै सल'फोरखौ आरो आं मिथिगौ लुबैयो बुहुमखौ।''