अरननि दाइरि 5.03 हांसो बेलाथिनि मुंदांखा

1025 सानसेखालि हांसोआ जोबोद खुसिजोँ गावनि गोसोबादिनो मेथाइ रोजाब्बाय, आरोबाव बियो बांसिन गारांजोँ जोबोद होख्रावनो हमबाय। 1026 अब्ला लैथोमायाव दुगैनानै सान्दुंआव मोदोम फोरान्नाय लैथोमानि गान्दा बोराया बागदावनायसै, हरखाबैनो बियो बालाबारियाव मेमब्रायबाय नुनानै हांसोआ ग्लाब ग्लाब मिनिना होनायसै। 1027 गान्दानि स्लिम जानाय मोदोमा बालायाव मेमब्रायना फुद्रुन जाबाय, गान्दानि थिखिनियाव रागा दावखो गारबाय बियो हांसोखौ खेबसेनो दाद्रि होनायसै। 1028 बियो रागाखौ हमथानो हायैआव हांसो बेलाथिखौ गोख्रैनो होसोबाय, हांसोआ हां गहां गहां जालायनाय खारबाय जेसेबां हागौ बियो फुवारबाय गांखं। 1029 खांग्रांलाय-खुन्थेँलाय खारै खारै बियो हाखो रायखसनि खाथियाव सफैबाय, दुखुजोँ बालाबारियाव जिरायना थानाय अब्ला रायखसा गुरलुब मोनखांनायसै। 1030 गावनि बिखा मावनायखौ लानानै हांसो बेलाथिया लासैनो बुंबाय- दहाय आंखौ रैखा खालाम हे जोहोलाव रैखा खालाम! 1031 हाखो रायखसा गोख्रै थाब्रुमै बिनि गोदोना सेरथेनानै बुंनायसै- नोँखौ रैखा खालामनोसो नोङो आंखौ हालुराव फैदोँ सानगारासै? 1032 नै मिथिखा नंखाय बोराय हांसो नोँनि गोदोनाखौ थबस्र बसगोन, आंनि नोँखौ बेसेबांबा नागिरबाय नोङो आं बबेवबा खारखोमाबाय। 1033 गासै मुलुगखौ आं सोमावनो हागौ खुगाजोँ हब्राना अख्रांखौ बायस्रा होनो हागौ, नोङो आरो उन्दै मासे हांसो अह' नोँनि बेदरा उदै बुङा। 1034 हाखो रायखसा हांसो बेलाथिनि गोदोनायाव हमनानै गावनि खुगा सेराव दिन्दां थिखोना आरोबाव मिनिबाय बेबादिनो बियो लासैयै बुंबाय। 1035 बेसेबा गोबाव आंदि उखैनानै थैहां-बरफहां जानो हमथारबाय, दिनै मोनजासिगोन नोँनि बेदरखौ नायहर आंनि उदैयाव जेबो गैया। 1036 हाखो रायखसा गावनि खुगाखौ बांसिनै फुवारना बिखौ सोनो नाजाबाय, बे समावनो गान्दाया फैनानै रायखसनि उदैयाव सौनानै खांग्रां होबाय। 1037 बेबादिनो आरोबाव गान्दाया खेबसेबाव रायखसनि आथिँआव गाख्लाबना होबाय, बियो दुगाजोँ आरो बुंनायसै- मिथिबायना आंखौ नै रायखस। 1038 नै बाहाय हगारना हो गोख्रैनो जेसेबां हायो खारथोँ बियो, आं बिखौ गोसो जायोब्ला सान-हर गावनो होसोना मोननो हागौ। 1039 अब्ला थिखिनियाव रागा दावखोना हाखो रायखसा सिखार फिन्नायसै, बियो जोबोद बोलो होनानै गान्दाखौ उदैयाव जोनानै खिस्राय होनायसै। 1040 गान्दाया सानायजोँ ओरैबादि खेबसे हब्रानायसैदि बालाबारियाव हाद्रिनि बेजाय खुवा खुबाय गान्दाया हायाव खेबसे खुग्लुबना गोख्रैनो रागाखौ खर'आव थिखोबाय। 1041 बिसोरनि गेजेराव गोमोथाव बुलायनाय जानायसै गान्दाया हाखो रायखसखौ खेबसे हान्थुआव गोसायै जोख्लाबना होनायसै रायखसा थै रना-रनि गबाय। 1042 रायखसा गोख्रै हाद्रिजोँ दाफबना थै गनायखौ होबथानायसै, बियो ओरैबादि रागाजोँ गान्दाखौ सौनायसैदि गान्दाया लैथोयाव खांग्रांना गोग्लैनायसै। 1043 बेसेबा गोथौ लैथोमायाव गान्दाया गोख्रैनो दोबैना गोदोलांबाय, जेब्ला बियो थाला मोनहैयो अब्लासो गागदावना दावखो फिनबाय। 1044 गान्दाया सिखारनानै गोर गोर खारबोना रायखसखौ सौनो होसोबोनायसै, नाथाय रायखसा बिनि गंखौ अन्थाइजोँ खुबैना गंसे बायहोनायसै। 1045 आरोबाव थसेल' गंखौ लानानै फारसे गंजोँ सौनो होसोबोबाय, होनबा रायखसा बिनि गंआव हमना सोर सोर दान्दिसे फिदिँबाय। 1046 रायखसा ओरैबादि फिदिँनायसैदि गान्दाया हब्राना मुलुगखौ माथ्रि फोनांनायसै, मुलुगनि गासैबो जिउआरिफ्रानो खोमा माथुब्लाबो आगोर मोनाखिसै। 1047 लैथोमानि खांख्रायफोरा गुदुंआव एब्रेबाय नाफोरा अन्थायाव एब्रेना रैखा मोनबाय, साम'मोना खल्थायाव हाबसोनायसै गावनि खल्थायाव हाबसोबाय खुसुंआ। 1048 बेसेबांबा गोख्रै फिदिँ फिदिँ फिउ गारहरनायसै रायखसा बहाबा गान्दाखौ, बिनि उनाव रायखसा हांसोखौ गोदोनायाव हमना बुंनायसै। 1049 नै बोराय हांसो बेलाथि सोनाब हालुराव आं थांनो लुबैबाय, अनजालि सिरिथाया बेवहायनो दंहैयो लैथोमाखौ बारलांनो आंदि हाया जाबाय। 1050 बेखायनो नोँनि बिखुंआव लानानै आंखौ लैथोमा बारहोहरदो, बेबादिनो अराय नोङो जेब्लाबो दैखौ सानस्रिनो गोरोँ जादो। 1051 नोँ जेरै लैथोमा सानस्रिनो रोँगौ बेबादिनो नोँनि मुंदांखाया थाथोँ, जेरै नोङो रायखसखौ मदद होदोँ बेबादिनो हुलाब हुलाब मोनजाथोँ। 1052 अब्ला हांसो बोराया गावनि मोदोमखौ जेसेबां हागौ फेदेरनो हमबाय, बियो रायखसखौ बिखुंआव लानानै लैथोमाखौ सान-हर गोख्रैनो सानस्रिबाय।