बारलाङो बार
R
Ronjoy Brahma
0
Altın Yaprak
बेसेदि गोमालाङो बिबारनि थमेन्नाय-सिरिनायनि खौरां
लाजिहां हिनजाव गोदाननि आथिँ थोँनैनि सोदोबबादि,
आथिखालाव एरफबदोँ बैसागिया जेन'बा
जानजिनि इसानाव रोखोमारि आगर गोथां।
सुस्रदोँ अख्रांनि जोमैया बैसोमुथिनि खालाय सोलेर
मिथिँगानि मेगन बेस्रां मोखांआ जोँखांदोँ,
बैसोमुथिनि आहार बह्रा बिखाया मावखाङो
खुसिजोँ सोबो बिफां-लाइफांआ गथ'फोरबादि।
सोरां लुफावनानै साना नायहरबाय थायो
बार एदावफैयो मोदोम बुज्रावनानै,
दैसानि दैया बोहैलांनायबादि सिरि सिरि
मोजां मोनखोमायो आं आन्थोरगैयै बिखायाव।
दिनै अख्रां बिरदावनानै रोजाबनायनि फाला
गोजोन्नाय गैयै दाहा-हांमानि जानाला सिफायनानै,
गोरबोखौ मुजिथाव गाब फोनो बुहुमा
आरो आंनि सोलेरा बिरखांङो उदां फारसे।
अराय सोमखोर रोजाबनो गिदिँ गिदिँ
अखा सिनाय गांखंखौ फोरानो आं,
रैसुमै रिँखांनाय खबामनि जुनिया सोदोब
जिरायथाव संसार दैमानि उदां गाथोनाव।
बारलाङो बार बुहुम बिलिर बिलिर
दाउसिनफोरनि गांखंबादि मेथाइ लिरो आं,
मोनसे लाथिख' जलंगा फुरायनो नाजायो
जिउ सुलुं गोमानाय मुखानि आन्दोआव।
Bu şiiri puanla
Henüz puan verilmemiş