बिसम्बिनि रिमोन्नाय: आं आरो अनजालि

मोदोमफ्रु मिलौदो रेबदैजोँ लाइजामाव बिलिर बिलिर, बारसे बिबार होफानानै अनजालिनो हरदोँ आं अननायखौ। अनजालियाबो फिन हरफिन्दोँ सना होनलायहरनानै... बारसे बिबाराव मासे सिखिरि बाहोना, आंखौ बिखा ख्लाव-ख्लाव मोनलायहोनानै। अननायखौ आं अनजालिनो खुसियै हरदोँ आरो हरदोँ- अनजालियाबो लादोँ आरो लादोँ गोबाथुमनो हालायै बुरजानो। बेबादिनो अनजालिया हरनाय मिनिसुलु सुदेम अननायखौ बागसुआव जोबै जोबै लादोँ आं गोरबोनि जलंगायाव बोनथुमनानै। आंनि मोन्दांथियाव आंनि बैसोआ बारायाखै बाङाइसो जालांदोँ- अनजालिया सिख्ला देरबाय बैसोआबो बांबाय बिनिया, राहा गैया सिबाय! आंखौ बुरखायनोबो हालिया! आं गाबदोँ सिरि सिरि, अनजालिया? ? बेयो बांसिन गाबदोँ- दिखार नांगा नांगा सिबाय! नोरजिया हावरिया बर' हारियाव जोनोम मोन्नाय आं सासे मावरिया! उखैनायनि जानाय आदार, थानायनि गंसे गोजोन देरा, आंहा मावनांगौ दं बिसोरनि- बिसोरनि रन्दैयाव रज'नाय गोदान फुलिखौ गायस्लायनो, हासार होनांगौ दै लुनांगौ। नाथाय अनजालिनो हरनाय आंनि गोगो अननायखौ आं लाफिननो हायाखिसै! अनजालिया जासिफैदोँमोन सिबाय! बियो दा गाबो गावनि दुखु लानानै नङा आंनि मिजिँखौ साननानैसो, आंनि थांखियाव बोर बिनानै मोदै फसर फसर। आं सानो- एसेबां रिमोन्नाय अनजालिखौ आं हमथा हायाखिसै बिनि बैसोखौ- बियो दा बाला गुदुंआव, बियो देरहागोन- माब्ला नाथाय माब्ला? ? आं बेयावबो सानै सानै थायोब्ला बैसोआ आंखौ बामख्रब फैगोन- आंखौ लोरबां खालामथारगोन।