बैसोनि सुथुरजोँ

सानस्रिफ्रा सिमब्रेफैयो आंखौ आंनि गोसो आरो सोलेरखौ जौमोननि दालाइयाव गसंना नायहरो आं गोलैहां गोलैहां। सानस्रिफोरा एखमबा गाग्लोबो मिजिँ सिफायना जिउखौ खंगा खालामनो, एखमबा लेङो बेसेबा अरनाव- जेराव रावबो गैया सिरि बाल्मिकिनि देहेन सालियाव। दुथां लाइमोन सोलेरनि अनागारि बिष गोनां सानस्रिफोरा अन्थाइ बिखायाव गेवलांनो नारा नाथा बाग्रायबायो नाथाय गोरसावो भगबान कृष्णनि मोनसे श्लकआव, हरखाब खोमायाव रिँफैयो- इन्द्रियाणां हि चरतां यन्मन' हनुबिघियते। तदस्य हरति प्रज्ञां बापुर्नाबमि बाम्भसि।। थोर मावना आं फावसय फिनो। सोर बेयो बैसोनि सुथुरा आंखि आरो दबथायनो हागोन! ? बियोदि दाबो गले गले फैयो! दुलुर दालार सोरजिनि मुलुगाव लाजिनाया हिनजाव सिख्लानि गहेना लाजिनायानो सिख्लाखौ खालामो हायना आंखौ बिसोरो बमब्रायो। बिघातानि हाबिला नेवसिनानैबो ब्रह्माया मोनाखै फापनिफ्राय उदां। गग्लोबदोँ आंखौबो सुथुरा बैसोनि गिलौ फालौ लाइमोननि। सितानि हायनायाव गबनानै सनानि लंकाखौ खोमादोँ राबणा द्रौपदीनि सि बोलानानै साजाखौ मोनदोँ दुर्योघना भीमनि गदाजोँ अंगनि रोदायाव। दिनै बैसोनि बेन्दोँआव आंनि सानस्रिफोरा सोलायदों अखा आरो सान्दुंजोँ हाद्रि आरो हाब्रुआव। दुथां बैसोनि सुथुरखौ फेजेन्नो फसंनो जुजिबायदोँ आं अमृतनि नेर्सोन बेसेबा गोजोँ गोथार हिमालयनि जौसिन थिखिनियाव। जिँगा बिदां सानस्रिनि बेन्दोँखौ मस्रायनानै नायहरो आं लैथोआव सोरां आंनि सायखंनि सायाजोँ जेराव आंनि सोलेरखौ नुनानै उन्दै गिदिर नाफोरा गल'ल' नायो, हुनुमाना बारलांनायबादि लैथोखौ लंकायाव बारलांगोन आं बैसोनि सुथुरखौ लैथोनि जिबिफ्रा खुसियै आखाय खबहरो जैरै।