गोसो थोखोमानायावबो गोजोन्नाय दं

गोसो थोखोमानायावबो गोजोन्नाय दं बेबादिनो आं जोबोद गोजोन्नाय मोनदोँ नुवाथारि गसाइखौ गले गले खुलुमना गोजोन्नायबादि नंगौहां नंखायहां जेरै गोबां बोथोरनि गोबां रंजानाय अनजालिनि रेसम खानायखौ हसारनाय बिनि बालेँ जानजि, जारौ मोखां खाथि दाननि दैसाबादि बोहैनाय मेगननि नोजोर माय बिलाइनि सासा बारनाय सुदेम बारबादि बिनि मिनिस्लुनायनि हायना गोनां रिफिनाय आरो आं गोसोआव लादोँ बिनि आगान आगान मोनफ्रोम खबामनि मिलौनाय आं बिखौ गोसोखाङो हर आरो सानाव दैमायाव लोहाबनाय गोजोन समाव अरनाव मोसाजोँ होसो जानाय समाव मोनहां मोनहां मैखौ होसोनाय समाव नाथाय मैखौ बेदर जानो होसोनायबादि आं बिखौ होसोआखै, सानफ्लाङाखैबो आं एखमबा एखमबा बावनो नागिरो बिनि गोदै सिदोब गारांखौ बेखायनो आं नागिरो दाउनि गोदै गारांआव उदाङै बिरबायनाय दाउफ्रिनि गांखंआव गुफुर गुफुर जोमैनि गेजेराव नाथाय आं बुंनानै लानो हायाखै आं नोँखौ गोसोथोयो होन्नानै थेवबो आं बिखौ गसाइनियाव बियो आंनि गोरबोआव खामफ्लाय बना जिरायनानै गसाइया बेबादिनो जेब्लाबो बुङो- गोसो जायोब्ला बुंनानै लाजायो नाथाय आं बुंनानै लानो हायाखै, बुंनाय जानाय नङा बिखौ सिमांआव नागिर नागिर जेराव गैया बेवहाय नागिर नागिर आं अरायबो गोजोन्नाय मोनो