गोदान बुहुम

दहाय सिथाबनाय अनजालिनि हरनाय लाइजामखौ जोबोद गोजोन्नाय मोनोमोन आं गले गले फरायनानै, बाकसुसिंनि करफुरालाय आरो मा? सानथ्रहायै बिबारनि रोखोमारि मोदोमनाय। सोरांबानो खारलाङोमोन पष्ट अफिसाव हांखुर जाफबनाय जोमै एबा खुवायाबो दोम थाद'योमोन आंनि बिखानि सोदोब खोनासंनो। लाइजामनि थाखाय आं दा जिंगासिलिया एबा अनजालिनि गारां खोनासंनो आं दिनै बिबारबारिखौबो गोसोखांलिया, मानोना अनजालिया उन्दुलांबाय आंनिनो बिखायाव। दैसा मारुं एबा बिबारबारियाव जिरायनानै हिमालयानि मोदानफैनाय फिरफिलाखौ दिन्थिहरोमोन आं, दा रिँखांफैयो हिमालया थिखिनिनि मेथाइ अख्रांआव रोजाब रोजाब लेँहरो दाउथुआ। खोमसियाव सिरिमोन्नो रोँगौ नोङो दाउसिन जोँनि मोदैखौ सोबखफै दिनै, आयनि दखना रुबैजोँ खाख्लुमनाय मोखांखौ दिन्थिफै। बारनि गांखंआव गोबानानै मोसाफैथोँ उदां आरो जोँनि आखायाव बारफैथोँ ओँखाम, बे खोमसियाव आंनि मोनसे थांखि जोँब्लावनाय सोरांखौ बोलानानै होफैनो। खोलो खोलो बारनाय बारा जोखोम जाबाय अनजालि नै अनजालि सिरिमोनदो! बारहुंखाबादि नोँनि मिनिस्लुनायजोँ फरायजायै आयनि मोखांआव सान ओँखारबोथोँ। आरो आइया देलाइथोँ गोदान दखनाजोँ गोदान साननि गोजोन बुहुम नायनो