हाग्रामानि सल' गोसोथोनाय: ब्रै

गेदेमा रायजोआव सानसेखालि सुबुंफोरा थैसावदोँमोन थर्ला बोरायखौ बयबो दायना होन्ना सानबाय। बिसि थर्लिहा बे समाव उदैयाव गथ दंमोन सानसेखालि हराव थर्लाखौ मानसिफोरा बुथारबाय। इनजुर गिजिजोँ खुनुरुखुम थर्लिया खारखोमालाङो उदैखौ लानानै बियो हाग्रामा मोनहैयो। बे हरावनो थर्लिया खुदिया जोनोम होयो बिनि उनाव गाव बेसेबा बाब्राबना थैलाङो। जुबजुब अखा हायो आरो एम्बुफोरा आदार नागिरो मासे उखैहाबनाय एम्बुआ गथखौ मनयो। गथ'आ जोब्राबना एम्बुनि गाल्खाबाव थाबथायो अब्ला एम्बुआ बिखौ फिन हगारो। बयबो मननो नाजायो एम्बफोरा बेबादिनो बयनिबो गाल्खाबा जलंगानि महर मोनो। एम्बुनि हानजाया लानानै थाङो बेसेरा गथआ मोनसे समाव मानसि आबुं महर मोनो। ददेरे सिख्लाया एम्बुनि राजखुंग्रि जाबाय बंग्लाया बिखौ अन्नायजोँ गेदेर खालामबाय। अरननि जासुलि मोसानिफ्राइ रैखा खालामनो एम्बु हानजाया जेब्लाबो बिखौ आंगो सानो। सानसेखालि बेलासि समाव गाथोन सेराव नुनानै जासुलिया बिखौ मेगन फेदेरना होसोबाय। अब्ला बंग्ला फिसाया गाल्खाबाव लानानै फिनज्राब दै सिङाव थब्लगारबाय। बेबादि गोमोथाव जाथायखौ लावखारा नुदोँमोन बियो बिफां सानिफ्राइ ओँखारबोदोँमोन। जासुलिया थांनायनि दान्दिसे उनावहाय लावखारा ददेरेखौ लोगो मोनफैबाय। लावखारखौ नुनानै बंग्ला फिसाया ददेरेखौ लानानै गोख्रैनो बारलांगारबाय। लावखारा सिफुंआव देँखो सुगदावना होबाय ददेरेनि महरा नुजाफैयो जायख्लंआव साया-माया। बे समनिफ्राइनो लावखारा बिनि सुलु लायो बिनि महरखौ गले गले जायख्लंआव नायो। जिरि जिरि बोहैनाय गोथार दैसायाव समाव गाखोना नायहरखोमायो बिफां सायाव।