हाग्रामानि सल' गोसोथोनाय: नै

रोमै रोमै मिलौहाब देँखोआ फाग्लि खालामो हरफाथोलो निन गैयै देलाइआ सानो। सोर जोहोलावनि सिफुंनि देँखो बेलाइ बबे खनायाव एसेबां बेबादि दामो? आंनि बिखाखौ थार्ला आवलि होनानै बियो आंनि गोसोखौ देँखोआव फोजावबाय। बेसेबा मोजां मोनहाबनायनि बियो देँखो आय' आंनि लाइमोन गोसोखौ दांग्रोमफैदोँ। बबेनि सोर जोहोलाव जाखो बेलाइ बिजोँ आंनि इयुन सोमोन्दोआ मा जागोन? बेबादिनो फाग्लि गोसोयै मालाइआ सानो- बे जोहोलावा एसेबां अनसुला जानो हागौदि? बिनि सिफुंनि देँखोआ मुलुगखौ गोबाख्रबो आं जायखौ मोदाय महरै मोन्नो नाजायो। सिमांआ नाथाय जोबोद मोथायखेबस' सिमांआ आंखौ सोगाबो आरो बुथारो। नाथाय जेसेबां सिमांआ आंखौ बुथारो आं थांनानैनो थानो लुबैयो थैस'थांस'। नै जोहोलाव नोँनि महर आरो मुस्रिखौ सिफुंनि देँखोआव आं नुनो मोन्नायमोनब्ला? आं हाथर्खिनिसिम आर'ज गाबगोन थेवबो जेरै नोँनि महरखौ नुनोमोनो मोकथांआव। सिफुंनि देँखोजोँ मोसानाय फामे बिलाइ आबुर गैयै अख्रांनि दाउथुनि गांखंआव। ऐ जोहोलाव नोङो आंखौ एदावबाय आंनि गुफुं लाइमोन गोसो आरो देहायाव। सानफोरा बारलाङो बेबादिनो हालोदैलो रोमै रोमै खेबफ्रोमबो हरावनो सिफुंनि देँखो। देलाइ आरो मालाइआ खोनामोनो मोथो मोथो बेसेदि बारआ बारबोयो बारलाङो गोरबोआव बिसोरनि मोजां मोन्नायनि देँखो। बेरल' लावखारा माहाजोनजोँ जेबो सोमोन्दो गैया गलिनि मोसौजोँसो एंगारनो हायै आंगो। आथिखालाव माहाजोननि गंनै गलिनि मोसौआ अनजिमायाव गलि गंब्रै जाफैबाय। सानाव सानसे अरनाव मोसौखौ गुमो मोनाबिलियाव गलियाव होसन फैयो लावखारा। हराव बियो दुखुखौ बावगारनो थाखाय गोसोनि देँखो सिफुंआव हगारनो हमो। फुंआव दैहुखि दैहु गायखेर सेरनानै बियो अरनाव मोसौ गुमनो होलाङो। हाग्रामानि जुनारफोरा लावखारखौ सिनायगौसै बिसोर बिजोँ गासै बाथ्रा रायज्लायो। लावखारा बयनिबो बाथ्राखौ बुजियो आरो गासै जुनार-दाउसिनाबो बुजिनो हायो। नाथाय लावखारनि दाहाखौ होखारगोन सोर अख्रांआव बिरदावनाय दाउसिना मोनदाङा। सुखु आरो दुखुनि साना फैयो लावखारा बेबादिनो जिउखौ दैदेनलाङो।