हाग्रामानि सल' गोसोथोनाय: द'

गोसोथोनायनि मुलि हाग्रामायाव गैया सिबाय उसुखुथुजोँ आवसाव जाबाय लावखार। खारबाय बंग्लानि गाग्लोबनाय जोखोम जानाय सानाया थेवबो रिङो ददेरेनि थाबफुं खालामनाय बारेबार। हाजोनि दाउराया बावगोमाहोनो नाजायो अखा खोरोमनायाबो एसेबां गोहो गैया। हाग्रामानि राजा फाथिनाय खौरांआ एवथुयो लावखारनि मुलुग नांसार अन्नायनि मुहिनाया। ओजोँ अरननि जासुला मोसाया रंजाखाङो जोनोमनिफ्राइ मोन्नाय दुगानाय फाग्लामिजोँ। दान्थाल मैदेरा गावखौ बयनिबो देरसिन सानो गावनि आफा गुवार आगाननि देरगानायजोँ। हान्दिलरनि राजाया गावनि खिलांखौ हर-सान उनबाय जिबौ फिथिगमा गावनि गाल्फाखौ फुवारसिनबाय। मोस्रोम गोसायाबो राजानि मासिखौ लुबैयो बाजोआ गावनि आसुगुरखौ हर-सान उनो। बंग्ला राजाया बेसेबा गोब्राबै थालिम होबाय मोसौनि राजा बलदआ गावनि गंखौ उनबाय। हाग्रामानि बिखा आंसोलजोँ बोहैनाय दैसानि खांख्राय राजाया गावनि दाबुखौ फोराबाय। हाग्रामानि गासैबो राजायानो खौरां मोनबाय थेवबो आयुमा आरो गेदेमा रायजोनि राजाया मोनाखिसै। थिख समाव दाउसिननि हांख्रायनाय मोन्नानै हाग्रामानि उदां गमादआव लोमसाव फैबाय जुनारफोर। दैबानाबादि अनजिमा गैयै दाउसिन एम्फौफोर बिफांआव बेरे आरो मोख्राफोरनि साल्दां-माल्दां। जिबौनि फोलेर आरो एम्बुनि फोलेर गुमा माख्रा आरो सस्रमाफोरनि फोलेर नुजाफैबाय। मोफौ नेवलाय आरो खुसुंनि फालो अमा सेसा आरो मैफोरा नुजाफैबाय। दावहायाव सोरबा जेनगोन सोरबा देरहागोन सोरबा जेनगोन निरासा सोरबा देरहागोन मिजिँ। सुखु आरो दुखुनि बायदि गाब बयनिबो गोसोआव गासैबो मैनानि मोखां जिंआव रोखासिन। लावखारा मैसोनि बिखुंआव गाखोना फैबाय जासुलि मोसाया बिखौ नुहरना लुबैनायजोँ उसुखुथु जाबाय। बंग्लानि बिखुंआव गसंना सोरगिदिँ नायहरना ददेरेया बिखौ नुहरना थाखोमाबाय। दिनै दावहायाव मोदोमफुरु थै बोहैगोन बिनि खुसियाव लेवार बेद्लावनि सालाया मेवबाय। हाग्रामाया थैजोँ खारग्लुंगोन हांलानो हायै जागोन बिनि थाखायनो जोमैया खाथियाव फैबाय।