मोकथां जिउनि सावगारि

1 सोरजिनि मेगन मेसेबगासेयाव खोमसि जानाय, समायना मिथिँगायाव दान्दिसेनि थाखाय मा रादाय? मानोदि जोनोम मिथिया आंलाइ! आबादआनो जायनि जिउ हाल खदाल, जिउ-जुनाद बिफां-लाइफां दाउसिन-दाउला सान्दुं-अखा सान-हर-बार-दै जायनि अरायबो लोगोआव बै बिफानि, बै बिमानि देरा रौमारि गामियाव जोनोम आंनि। जोनोमनि उनाव आथिँ जोब्राब जोब्राब जोबोद खुसियाव मोसायै मोसायै आय-आफाखौ नुजेन्दोँ आं नुदोँ गावनि आंगो बिब' जाथि खुरमा बाय बाहागि नुदोँ मुलुग मिथिँगा सोरजिगिरिनि सोमो गोनां सोरजि। जोनोमनि उनाव खोनादोँ आं आयनि गोदै गारां आयनि आहाराव अरथाब अरथाब गावनि सोलेरखौ फेदेरदोँ। जोनोमनि उनाव खोनादोँ खोमायाव बिफां लाइफांनि सोदोब दैमा-दैसा, दाउसिन दाउलानि देँखो जोमै अखा खोरोमनायनि सोदोब खोनादोँ खोमाजोँ आं गारि मटर- सुबुंनि देँखो। जोनोमनि उनाव खुगा बिसिनानै सोलोँदोँ आं आयनि गारांजोँ आयनि रैरुब फोरोँनायजोँ गारां बोनो, देँखो हगारनो आयनि आसिजोँ हांखो सिनायनो, जोनोमनि उनाव आं सोलोँदोँ आथिँ आखाय सोमावनो मानबायनो थाबायनो आरो खारनो बाज्लयै बाज्लयै मोसानो जोनोमनि उनाव सोलोँदोँ आं आखल आखु गियान आरो सोलो बुद्धी जिउआव। 2 बामै बामै खुदुमै बिलिरै बोजबै मोसायै मिनियै रंजायै फोरोँङै बुरखायै गोबायै समायनायै आय आफाया अनबोदोँ जाहोयै लोँहोयै फेदेरदोँ। आं हाब्रु-दैस्लुं-हाद्रियाव गेले गेले देरबोदोँ आंनि आयनि आखाय आं आफानि फाफ्लि गेले गेले मोसा मोसा जिउ उन्दैनि आनजाद उथ्रिदोँ। अखा हाब्ला दैस्लुंआव सान्दुं दुंब्ला हाद्रियाव फुं बेलासि सिलायाव गेले गेले देरबोदोँ।