मोकथांसो दावहाथिलि मुलुगनि

फागुणनि बारजोँ गोर गोर खारबोनानै थाब्रुम गोबाख्रबना खुदुमनाय बै समनि बुब्लिखौ आं बावबाय सना - एडेन बागाननि सेर सेर रमिअ' आरो जुलियेट मोननि रावना रावनिनि मोजां मोन्नायखौ गोसोखांनानै (आदम इभनि मोजां मोनलायनायखौ बावफ्लांथारो आं) बाथौ गिदिँ गिदिँ खोथाहोनायखौल' आं बावनो हालिया सना - सिमांआव सा कामरुपनि निलाचल हाजो सेराव आलो गोजोन संसार जानाय माहुर दैसा सेर सेर जोँनि रमान्टिक गेलेनाय बेयो सिमाङानो जाथोँसै सना - अब्लाबो दाइरियाव एरखां जाथोँ आं नोँखौ बावनो हाब्लाबो नाथाय नोँखि आंखौ बावनो हामारगोन? - लुन्दुन लुन्दान मोदोम गंसे जेखाय खबाय बाना लाबोनाय रिदि रिदां खाम सिफुं सेर्जा नांगोल जुंगाल दाङानाथा जेन्थोर आजै आजौमोन हादान लाफैनाय नोँनो खोनाबाय सना चीन तिब्बेतनिफ्राय भारतसिम फैनायखौ - नोङो मिथिगौ सना रामायण महाभारतनि दावहाखौ बेफोर सिमांनि नङा सना मोकथांसो दावहाथिलि मुलुगनि - मा नोङो गाबदोँ? आंदि आरोबाव दावहायाव ओँखारबाय नोँ दागाब सना आबै आबौआ फबना गालांनाय मायबां थैफ्रा दिमाफुर खासफुर नेफाल प्रागज्योतिसफुर जेरावबो थरफा थरफा हिराया दाबो दं - नोँखौ आं जुलि लागोन सना नाथाय दिनै नङा गाबोनसो आबाद खालामगोन सानैजोँ गेवलां गेवथां बिबारनि अखाफोरनिफ्राय हासार लाबोनानै जाय माब्लाबाबो लह्रायनो रोङा।