नोँनो जबा नोँनो गलाब

नोँ मानो गाब्बाय थायो जाम्बि मोदैनि बिलोआव फामेया बारोसै? आरो थोबफा थोबफा नोँनि मोदैखौ बेरे-बेरेमाया लांनो फैया बिदैनि थाखाय, मिथिगौ- मोस्रोम जाथिया नोँनि मोदैयाव गोजोमनो फैया! गावनि मोखांखौ आयना गोबायाव दानायसै गाबब्रु मोखांआ एरलांगोन नोँनि, आरो गावखौनो नोँ नुगोन साथा नांनाय फिसाय थैगोदान सासे रान्दिनि मुस्रिबादि। दुब्रिनि थरथिँसे निहिरजोँ मोखां बिलिरना दैस्लुंआव नाय अब्ला नोँ नुगोन बेसे समायना अख्रांआ! बोथोर गोदाननि सोमखोर बिखायाव खेबसे गोबा अब्ला नोँ लुबैगोन अराय थांनानै थानो। अनजालि नोँनो जबा नोँनि गलाब फामे बिबारबादि गोथार नोँनो, जिरि जिरि बोहैनाय दैसायाव गोजोमना नाय बेसे अनसुलि मिथिँगानि गोरबोआ नोँनि मोदैजोँ फामेया बारग्लांगोन थासान दाउस्रि गोबा नुजाया नोँनि गाबनायाव, एबा जेनथखा बारग्लाङा रंजालिनि गुस्थियाव नोँ मानो गाब्बाय थानो जाम्बि? नोँ खेबसे मिनिस्लुना रायदाव आंजोँ आं नोँनो होगोन आबुं रंजानाय, नाथाय गोसोखौ बारनो दाहो सेफालि एबा खारौखान्दाय बिबारबादि। दाउसा मोख्रेब नङा नोँ रजे एबा नङा देमदेमानि साम'लादाय, थै गोनां गाबनि जारौ जबा नोँ बारखौरां मोदोमफुरु गलाब बिबार नोङो