ट्रेजिडि ना कमेडि

खोमाजोँ खोनादोँ जायखौ लाथुमदोँ सोदोब बिखौ, मेगनजोँ नुदोँ जायखौ सावगारि बोदोँ बिखौ, आंनि गोरबोआव सानथ्र'हायै आन्थोर गैयै बाफब्बाय- मैला? खोमा-मेगन गोसो आरो गोरबोआव; आं सानदोँ सुस्रानायनि समा जाबाय। बियो आंनि खुगानि खौरां? ना- खुसेरबायनाय खोलोमनि लांदां बिलाइयाव? ना- सोरनिबा सावगारि खावबायना दायेरियाव लिरबायनानै साजायनाय? गोरबोनि आयनायाव नुजासारनाय गोसोनि मेगनाव बिरथिँबायनाय दमात खानानै दंथारो मिनि बाला-बाला? ना- बाथुमनानै थादोँ गुस्टि गाला-गाला? होंगो-दोँगो गासैबो सोदोब आरो सावगारि गोरबो मोनफा मेगन गुलाइ-गुजाइ। गोरबोनि गोथां थैजोँ गोरबोनि सोदोब बर'न्नाया खन्थाइगिरिनिसो आखल, आरो... गोसोनि महर आखलजोँ गोसोनि सावगारि साजायनाया महरगिरिनिसो सिमां; नंगौ, - हान्थु गसंनाय खामफ्लायाव ज'ना सावरायना खोथाया फैया, सैमा उन्दुनाय गिजि बष्टायाव ज'ना खालामनाय दियानाव इसोरा साफिया? दुंबुर जिगाबनि बिसिनायाव गोजोन्नाय मोनो मेसेबनो? मैला नांनाय जोँनि हारिमुआ (बिक्रमनि मथे दखना सुरि, जारिमिन बिलाइया उरि-हाफाव, रांखान्थिया खामसिनाय सान्दांगा,) बेखौनोबा हनै दैबायनो हादोँ खबर। थांगोन गन्दायाव गोदानाय दाउ-अमा-बोरमाखौ बर'फ्रा जानो खहाबलिया बिसोर जायो खागदावना हाख्लाबनाय। नाथुर-साम'-खांख्रायथ' मोनखालिया लैथो-लैथोमानि खुगा गुवार ना बेसो उदै बिलिरो बिसोरखौ। नै गोजां बोथोर फैलायबाय- बिसोरनो नांगौ- बोरमा मेन्दा खोमोन, थिक दं; सुमलि, खुन थुलाखौबो बिसोर नागारा। आलाखाटारि बिलिरनाय सिदा गाम्बारि गोबोरजोँ दाफबनाय इन्जुर बेरा बाथामनि न'आबो सान एब्रेया दा बिसोरबो सुमलि थुला बाफबनाय, आर्-सि-सि बिल्दीँखौ दाबुंसै (होस्-स् बिसोर रिँटन गाब्बानो फिउ गारहरगोन) । गराय आसुगुरनि जुथाया मानसिनि आसुगुर जाबाय, नंगौ हाद्रि हाब्रुआव थाबायग्रा मोसौ मैसोनि आसुगुर नाङा, बर'नि रांखान्थिया खामसिनाय सान्दांगा, नंगौ; गोलोम बोथोरनि महरखौ सावगार जोबब्बाय फैलायगोन गोदान बावगारगोन गोजाम। गोजामा गोमागोन गोदान फैगोन। बेनिखायसो नामाथाय- बर'नि जारिमिन बिलाइया उरि-हाफाव। मायहुं हुंनो दोन्नाय जिगाबा सावगार जाबाय, सल'बाथा खिन्थानो रोँलिया बिसोरनि आबै-आबौआ खालि रोँगौ रमान्टि दाहोना-रुवाथिनि गोसोथोलायनाय दोनखारलायनाय आरो- आरो मा? जिगाब खनायाव सावरायनाय, फिसौफ्राबो खोनासङो बेखौनो गुस्थि गाला-गाला बेसोरबो सोलोङो बेखौनो खालामबावगोन आरो मडिपाई। नांगोल मुटि हमनाय मोसौनि उनाव थाबायनाय दानि गथ'फोरनि (सेँग्रा-सिख्ला) जाबाय जाम्बानिसो सल' खुगानि, मिनि बाला-बाला हाजिदावनाया बिसोरो उनाव थफ्ला रुजुनग्रा मुम्बाइ बेँलराव, मार'वारि-देश'वारिनि सोरलाब सोरथाब बिगुराव सिथाबना गोरबोआव दाखोन खानाय सि: सि: सि: मुगैनाय सोदोब। दादुआवला सैमा दादुराजोँ खुगा सोलाजानाय, सिखारि खालुजोँ सोँख्राव जानाय खोमसि हराव अन्थाइ जोथ्रोदनाय खांग्रां-खुग्लुब मेँब्रायनाय थै जाहाब सोलेर बेद्लाबनाय दैज्लांआव अखा गोजां बोथोराव निहोर मोदै आरो गोलोमदै गाबनाय रंजानाय, दाखा दाखा फालो फालो आंनि गामियाव दाबो दं।