दानख' जानाय रमान्सनि रेगा
R
Ronjoy Brahma
0
Altın Yaprak
गाबदोँ आं सिमांआव मोकथांआव
सानसुआव हर गेजेराव,
खाफाल सौलाय बिखा गावै गावै।
अनागारि हाद्रिनि खुवाया
गगा मोनहोदोँ गोसोखौ,
हर गेजेरनि गुदुं निहोर
बोराय मेगननिफ्राय गसरदोँ।
आथिँनि मिनिसुलु माराम आसुगुरा
लामानि अन्थाइ थाइसेखौ
हमथा हायै रागाजोँ अरखुयो,
नाथाय हाथाइ मोग्रेमो
रुजुनो दाहानि बह्रा बिदां।
जरासे दाउसिनखौ नायहरफ्लांब्ला
बिरलाङो हार्सिँङैनो-
(गोसो जायो दाउस्रि हाजिबादि दिजायनो)
मेगन मेसेबनानै जोमै जोमैयाव एब्रेनो।
बिफांआव बिलाइ खिलियो,
बावनो हायै समनि बिसम्बिखौ फोजोबनो
लैथोआव थब्ल'यो आं।
नोँ थांनानै दं दाबो,
दाबो मिनिसुलु-
नाथाय आं लुबैयो-
सावै सावै हाथफ्ला खालामनो
नोँनि मुं महर बुथारथारनो।
मानोना-
दानख' जानाय आं नोँजोँ
नोँनि गोरबोनिफ्राइ,
बेनि दिखार दं गोरबोआव
दानख' जानाय रमान्सनि रेगा।
Bu şiiri puanla
Henüz puan verilmemiş