दिनैनि बिलाइयाव

1 जे जे अखा हादोँ एसेनो आंबो कमबल फानफ्रे सिन्दोँ दाउला गेसेरनाय सोरांनायखौ थाल गैया आयनि फोजानायखौ, आं सिमां नुदोँमोन एबा नुवाखैमोन गोसोआव गैलिया; नाथाय थाल मोन्दोँ आं आब'नि खोरखि बुज्रावफैनायखौ। सिरिमोनबाय अब्लाबो सानेरनानैनो थाबाय। 2 आफानि बोसोन आयआ फालियो आयनि बोसोनखौ आं फालियो मैयासो फैदोँ आं लजिँनिफ्राय मावा दाङा जानायनिफ्राय, दैज्लां जाबाय हाल खदालनि बैसो जाबाय। आफानि नांगोला गंनै गंसे बोरायबाय फाल गैला, नांगौ गोदान फाल- दिनै हाथाय हाल गथायना आंनो लायगोन आफाया। 3 आफानि हाल हुरनलांनायखौ थाल मोनाखिसै मोनाखिसै आयनि फोजानायखौ खोनायाखिसै आब'आ फोजाब्लासो सिरिमोन्नायसै अब्लाबो बे जे जे अखायाव- आं कमबल फानफ्रे फिनदोँ। समा थांगासिनो थांबाय ओँखाम थफ्ला बोननानै थांनायसै आयआ जाम्फै मोनसे बारनानै नाथाय बिनि उनाव? बिनि उनाव आयआ दाय जानायसै सिबाय हाजासे इसेबांनि बाराबाव बिखा मावनाय रायजानायसै। 4 आयआ खोमसि मोखां दुखु लाना न'फारसे फैफिनबाय सिलायाव आब'जोँ सावरायदोँ अब्ला आं अलसिया गोलांदोँ गासै रावफोरखौ आं खोनादोँ। आं जोबोद जोबोद अलसिया गावनो गाव आं बुजिबाय। 5 आफाया बोरायसिनबाय आरोबाव बोलोआ खमायबाय आं दिनै बिबान गोग्लैबाय आफानि नांगोल मुथियाव हुंखा सुंनो आफाखौ हाजासे मदद होनो नाथाय आंदि एसेबां अलसिया! आंनि दाय आयआनो बानबाय नाथाय आरोबाव आयआ हाबावगोन? आयआबो बुरिबाय, दिनै आंनि समाय आफानि खावसे खामान आंनि।