थिरिँ बिरिँ 1216-1286

1216 सिनायै बिलाइ गेजेराव नोँ रोजाब फैयो रोजाब नै दाउसिन नोँ- 1217 आं सान दावबायारि गोथौसिन गोजानसिन दावबायो फैसालि गैया मिजिँनि। 1218 बेबादिनो जेब्लाबो नङा नोँजोँ लोगोसे जाय बावलि बेसेदि साना दोरोदलाङो। 1219 फुंनि साना हरनि खोमसिखौ बेबादिनो होखार हरो आंनि दुखुखौ नाथ्रोद हरो सोरां आंनि गोरबोआव थानानै। 1220 गोजोन बेसेबा खुसि रैसुमै बारआ बारबोयो बेसे समायना गोसोआव आंनि। 1221 बेसेदि दावबायारि लोगो रैसुमै जिउ खबामनि आरो मोकथां दाहा अरननि- 1222 मोकथांखोर आरो बेसेबा सोमखोर हरनि अखाफोर हाथर्खि नोँ- 1223 सिमांनि गोथार सान दावबायारि सानस्रिफोरा रंगिना संगिना जिउनि। 1224 आं उदांनि दैसायाव जेराव गोजोन मिरु मोकथां नक्षत्रनि- 1225 बेफोरो फायखनो खामग्लियो- मिजिँ बेफोरो सुजुयो। 1226 बेबादिनो आं सासे गासे जिउ नक्षत्रनि गोगो गोरबो गोरबो दावबायारि- 1227 सोरांआ बेनिफ्रायनो फैयो गोगो दैसानिफ्राय- आंनि मेगनाव नांफैयो। 1228 आं दा उन्दुगोन आंनि गोसोनि सिङाव गोजाम मोकथांखौ खोबथेनानै। 1229 आं उन्दुलाङोब्ला जेबो गैया गोसोआव गोखा मुगैनाय जेबो गैया। 1230 आंनि सिमांआव थायो उदां अख्रां, सोमखोर मुलुग बोहैनाय दैमा-दैसा। 1231 सैथोनि सोमखोर गोरबोआव समायनाया थांना थायो बेसेबा खुसियाव। 1232 बेबादिनो जिउआ थांना थानायावनो थांनानै थायो गसाइआ जोँनो होदोँ बेखौनो। 1233 सुखु आरो दुखुनि सना बे जिउआ सोमखोर मोकथांनि। 1234 बेसेदि समायना जेरैबो नायहरो आं- मोकथां सोमखोर मिथिँगा 1235 गोसो आरो गोरबोनि खुसिजोँ बिबारबादि मिनियो मिजिँ गोनां मोखां आंनि 1236 आंनि दुलाराइ मुलुगाव बायदि आबादनि फिथाइ बेजोंनो आंनि जिउ। 1237 लिरखानाय हांखोखौ फराय फराय बेजोंनो आंनि मिजिँ नेनानै थायो आं आंनिनो हावाराव। 1238 नोँनि अननाय नोँनि मोजां मोननाय नोजोरा आं मेगनाव गेलेदोँ 1239 नोँनि मेथाइनि निसाजोँ बोदोर जायो आं नै दाउसिन रैसुमै नोँ। 1240 गसंना थायो लामायाव गामिनि लामायाव उन्दै समखौ गोसोखांनानै- 1241 दाउसिनमोना गावसिनि बासायाव बिरलांबाय जि जि जा जा- 1242 आं बिजाब फरायदोँमोन आयआ आंखौ गाबज्रिफैयो ओँखाम जानाय समा जाबायमोन। 1243 बेसेबा समायनामोन सान ओँखारनाय हाबनाय समावबो आं खुसिथारमोन 1244 लोगोखौ नेनानै दंमोन मेथाइ रोजाबनानै गांखं फुवारबोयो 1245 फोरोँगिरिनि जोनोम सानमोन हामलायथि होयो फिन साबायखर होयो 1246 समायना सोरां जोँथि फैदोँ सोमखोर आंनि मिथिँगायाव 1247 नै आंनि गोसो बहा बिरलांनो अख्रां सा सा- 1248 साननि दुंनाया नांफैयो खामनोसैबादि- जोँथि माथि बाला जोँख्लाबो 1249 अखा हालांबाय सुदेम बार बार लांबाय फिरि फिरि 1250 बारखौ नेना थादोँमोन आं दुंहाव बुब्लियाव दाउसिना रोजाबो रैसुमै 1251 सायख्लुम जोमैजोँ समायना बिफांफोर सोमखोर सोमखोर अखोरां 1252 खन्थाइ लिरो गेलेफैनाय सोदोबजोँ रैसुमै मासुमै गेलेयो 1253 मासे दाउसिन आंनि मोखां सिगांआव नायथिँ नायथिँ आदार खनजायो 1254 गलाबनि गेवलांनाय बिनि मोदोमनाय आं नुयो मोन्दाङो 1255 सनाथि फुंबिलि सान मोन्दांथि लुफावो आलायारन आंनि गोरबो दिथौआव 1256 आं मिथिगौ सुदेम बार बारनायाव गोजोन जायो गोसोआव। 1257 लिरैनो लिरैनो 1 रोजानिबो बारा खन्थाइ लिरबाय आं 1258 जेरैबो सोरां आं नुयो बारजोँ मोसानाय बिलाइ बिफांआव 1259 रिफिनाय साननि सोरांआव साथियो आंनि गोरबो मिथिँगानि मेगन 1260 दिनै फरायो लिरो सानो फोरमायो आरो हार्सिँ आं गोजोनैनो 1261 सानफोरा थाङो समनि बिदिन्थाजोँ बेबादिनो आं सोलोङो 1262 सोरां जेरैबो सोमखोर अखोरांआव गेलेयो आं गोरबोजोँ 1263 नै साबायखर समायना खुलुमो नोँखौ समायना मिथिँगा 1264 फुंनि आलायारनखौ नायहरो सोरगिदिँ लामायाव मेगना गिदिङो जेरैबो आंनि। 1265 अखा हाहां हां आं खारहां खारहां बिसोरो आंखौ फिसिगोन 1266 दाउसिन गांखं फिस्रियो बिनि रंजानायखौ खुसि- आं नायहरो 1267 हाजोखौ नायहरदोँ आं बिरलाङो गोसोआ- सौखाव लाङो अरन 1268 दलरै जिरायना थानाय समाव दाउस्रिफोरा खायसो खेबलायफैयो सिलायाव 1269 सना फुंबिलि सुदेम बाराव दुब्लि फोथारा जोँख्लाबो 1270 जारौ अखोरां फुं समायना आलायारन समायना साबायखर नोँखौ 1271 बैग्रि जादोँ दाउलुरमोना बिरखारलाङो गिनानै आंखौ नुनानै 1272 गोसोआव सानै सानै सोदोबफोरा जमा जादोँ खन्थाइ महर लादोँ 1273 गरम जोबोद गरम अखा हालांबाय अख्रांनिफ्राय मोसानानै जोबोद गरम अब्लाबो- 1274 साना ओँखारबोबाय सिरि मोनबाय मिथिँगानि नै आंबो सिरि मोनो। 1275 जोबोद सुदेम मोनाबिलि बार खोलो खोलो हरा गोजोन जागोनबादि 1276 मेंग्लियो थाबायनानै दुंहाव लामायाव थाबाय नांगौ जानायाव थाबायबाय आं- 1277 मेंग्लिबाय आं थाबायै थाबायै आथिँजोँ लोरबां जायो दिनै 1278 गोसोआव लाथाव सान जोँ फालिबाय दिनै सान बेफोर रंजानायनि- 1279 आंनि थाबायनाय फुंआव आं नुयो बुहुम आरो अख्रां साननि साथिनाय सोरां 1280 साइकेल सालायना फुंनि लामाजोँ सुदेम बारखौ उरसि उरसि सम बादिनो सफैयो आं 1281 दा दा सान्दुं जेबो जेबो दाउसिन रोजाबाखै जेबो गोदै मेथाइ गैया 1282 गंगार हाजो फारसे नायहरो बाखो बाखो हाजो समायना नुहरो आं 1283 दाउसिना लेँहरो मुसुरै मेथाइ खनै सिरि सिरि बारबोयो बार 1284 खोमसियाव थाखोमायो मिथिँगा खोमसि खोमसि जेरैबो नुवा दालाइ बिलाइ बिफां। 1285 गोजानाव मेथाइ जाखाङो रोमै रोमै रैसुमै सोरनिबा गारांआव 1286 जोँथि माथि जोँनाय अखोरांआव मोखांजोँ मोजां जायो आंनि मेगनजोँ सौग्रावो।