थिरिँ बिरिँ 148-195

148 गोरबोआव मेवखाङो हरखाबनो गोजाननि रिँनाय मेथाइया खोमायाव हाबाब गोसोआ बाज्लनो नागिरो- हुरा हुरा रोजाबो लोगोआव। 149 मेँहाबनाय सोलेरा गोग्लैसोयो सानहाबना बिरबाय बिरबाय गोरबोआ लोर सोर मेँग्लिना जिरायो आय' सानस्रिनि फैसालियाव बिरलाङो। 150 सना गाब, गोजोँ जोँनाया ख्लाब ख्लिब मोदानो मेगनाव, मिनिस्लुनाय मेगन मोखांङाव गोग्लैयो मोनाबिलि मोनाबिलि बिलिरो सुदेम बारा। 151 गुसु गोरबोआ थनथ्र लाङो साननायनि लामा गैया सुहाबो, मिनिनाया हरखाब फैयो सिमांङाव गुरलाब सुरि नागारना सिखारो आं। 151 देँखो बोना मोसानाय गिदिँ गिदिँ सेर सेर आंनि थाम्फैया फालो फालो खोमसियाव खहाबनाय गैया आंहा मानोबा। 152 गोसोनि लामा लामा हार्सिँङै नागिरो गोरान हाद्रियाव माबा आरो दान्दिसे जुब जुब अखाया हाब्रु खालामो थाबायो गोरबोआ हुरा हुरा- हाबाब मेँग्लिना थाद'यो आं मोकथांआव। 153 हानजामोनसे मोस्रोमा बुद्रुदोँ गोथै खानस्रिनि सोलेर, गुदुंआव बोलांनायसिम- नायगासिनो दं आं। 154 गाहायनिफ्राय गोजौआव आं नुयो अख्रां- सायाव बिरबायनाय दाउसिन। 155 दा जोबोद गरम जोबोद उसु खुथु आं, अखा हादोँ- दान्दिसे गोजोनमोन नायनानै। 156 नोँखौ बांसिन गोसो खाङो जेब्ला हाथर्खि जोँसार बोयो, दिन्दां अखाफोरा मेगनाव गोसो खाङो उन्दै समखौ। 157 अनजाथाव नै बेयो- थेबथेफारि उन्दै दाउसिना, आं रोजाबफायो मेथाइ बिनि खबामजोँ उन उन। 158 हरा खोमसिमोन अखाफोरा मेँग्लिनाय, आं आन्दायो- नैबे लामायाव। 159 नैबे जिउआ नंखाय नङा, मिनिनाय आय'- नै गाबनाय; समायना दं गोजोन बेवहा। 160 हार्सिँ मिनियो, बेवहाय दं गोसोखांनाय बेवहाय दं गोजोन खुसि। 161 बिसोरो फैयो गले गले आंखौ रायदाव फैयो, आं फोरमाय हरो- फै बेबादिनो देलाय देलाय। 162 सोमखोर मिथिँगानि बिलाइआव आं जिउ मुसुखा, खन्थाइ बेवहाय थांना थानायनि। 163 मिनिग्लाबनायखौ बुस्रियो गोजोन्नाय दं बेवहाय, आंनि गोरबोआव- रिफिनाय सोरांनि। 164 बियो फैदोँ, बरायो मोस्लेद मोस्लेद नाथाय- मिजिँ दं बेहा फै फै गोरबोआव। 165 बिबार बादि जेरै- आंनि गोसोआव मिनिनाय, सुदेम दैसा गोरबोआव। 166 आंनि जिउमाया गेवसारनाय बिबारसो, थख्रबफिन्नाय सान्नैनि नङा। मा माया सौग्राव फैदोँ नायदोँ खेबसे हमथानानै, दान्दिसे रायज्लायो- फिन हगार हरो आं। 167 फुंनि जारौ सान आंनि खावलायाव, आंनि सोलेराव खुदुमो बियो बिलिर बिलिर। 168 सानसुलि फोथार गेजेराव, गोमो हाबो गोथां दुब्रिखौ, आं लासैयै थाबायो। 169 गुसु अखा, थरथिँ थरथिँ थरथिँ- आंनि सोलेराव। 170 बिलाइ मोसादोँ सुदेम बारजोँ फुंनि- समायनानिफ्राय समायनासिन। 171 थाबाय थाबाय लामायाव थांनाय सिमांखौ गोसोखाङो, समायनामोन दिनै सावगारिया। 172 दा सोदोबनि ओँथि नागिरनानै सोर-सोर-सो गिदिँदोँ खर'आ, नुदोँ हैया नावआ गेलेनाय, बेमा माखासेनि। 173 फुंनि समाव जोँमाखौ नायनानै- नोङो बयनिबो गोजौआव थानानै मिनिसुलु मिनिहरनानै नायहरो नोङो नायहरो। 174 मेँग्लियो रंजानायाव, गोग्लैसोयो सानस्रियाव, आं मिनिनो आरोबाव हालिया। 175 जोबोद खुसियाव दं बेयाव रंजानाय, आंनि देरहानाय बेयाव दान्दिसे। 176 मिनिदोँ आं, मिनिथाव जानायनि थाखाय गाबदोँबो दुखुनि थाखाय, गोजोन गैयै नङा। 177 आं थाबायदोँ, थाबायगासिनो थाबायदोँ नाथाय थांखि गैयै नङा, रावनिबो बाथ्रा खोनाया। 178 समायना आंनि गोसोआ दाउनि रैसुमै (फुंनि) गारांआव, बोजबो आं बिखायाव। 179 आङो दा उन्दुबाय खुसिनि सोरां हास्थायनानै, फैफिनगोन दाउसिननि रंजानाय। 180 आं अख्रांआव नुहरदोँ थं सिलायाव गसंनानै- मिनिस्लु मिनिस्लु हाथर्खिनि हानजा। 181 मुलुगा सोरां, समायना अखाफोरनि मिनिस्लुनायजोँ, आंबो गोजोन खोलो खोलो बारजोँ। 182 जोँलारि अख्रांआव थुलुंगा गोनां मिनिनाय, बिसोरो आंखौ रायदावो- फै फंबाय थांखियाव। 183 आंनि गोसोआ दद्र थाहाबो सानसुनि थिँ थिँ सान्दुंआव, गोमो हाबो मोनाबिलिनि सिरियाव। 184 गोलोमदै गसरनाय सोलेरनि सावगारि, आं नुयो समायनासिन आंनि, थांखि बेवहाय गोगो। 185 मिजिँ आं रनसायदोँ आं लुफुंगोन सिमां, मोन्नै दैमानि गेजेराव। 186 आंनि गोरबोआ सोमावसारो खुद्रिनाय सानसुआव, जिउनि सुदेम मिजिँआव। 187 गोमोथाव आंनि सलआ आं गोसो खाङो, आबै आबौनि खरलेब मोखां। 188 आंनि सल'खौ आं बावगाराखै सोनानै लादोँ जलंगायाव गोरबोनि जलंगायाव, थांनानै थादोँ मुलुगाव। 189 रुंनायनि बेसेबा गोजानाव गारबोबाय आं गोजामखौ, समायना दा जोँखांफैयो गोरबोनि बिसम्बिफोर। 190 फैगौ समायना फुंआव खोनायो आंनि देरायाव रैसुमै दाउनि रोजाबनाय। 191 आं फरायो आंनि गोरबोखौ गोमो गोथां हांखोखौ, जिउनि बायदि बिसम्बिखौ, आं सोलोङो आंनिफ्राइ। 192 आंनि मिनिनायखौ आं नुदोँ आयनायाव आंनि गाबनायखौ, आं नुयो समायना। 193 अनसुला आंनि मुलुगा आंखौ अनबोदोँ अराय, आंनि गोरबो बिलिरनानै। 194 नै दा आं नुदोँ आंनि मिनिस्लुनाय, आयनि गोगो अननायजोँ; आंनि जोबोद गोजोन्नाय। 195 आयआ आंखौ फोथाय होयो बे मोजां मोन्नाया आयनि, आंनि समाय- आयआ आंनि जिउ हां मोनसे।