थिरिँ बिरिँ 539-606

539 गोसोआव जिउनि रादाब थांना थानायनि- संसार दावबायनाय लामा। 540 दिनैनि फुर्णिमा हर गेजेराव थं गसंना आं नुयो- गोसोम जोमैनि फाइलि निला सोमखोर अख्रांआव। 541 गोसा सान्दुंनि फोथाराव हार्सिँ आं गोरबोआव रैसुमै, आंनिफ्रायबो जौसिन सायखं - आं नुदोँमोन। 542 मोनाबिलि मोनाबिलि सोमखोर गामियाव दैसानि माथावरियाव आं दंमोन, अब्ला दैसानि गोगो बिखायाव साना थब्ल'बाय; दाउसिनफोरनि मिनि लांनाय आं खोनादोँ। 543 अखाफोरा खुसियै- जोमैनि गब्लं गेजेरजोँ खेबले खेबले आंखौ नायहरदोँ, फुर्णिमा दिनै हर गेजेराव। 544 सोमखोर हाजोनि खर'सायाव थुबुर जादोँ दाखासे जोमै, गोदान मिथिँगानि गोदान दुब्लियाव गोजोनै समायना नायहरो आं। 545 बोराय सयकियानि सिला, खोमसि अखोरां नै बेयाव; मेगनाव जोमैनि खेबसे मिनिस्लुनाय। 546 अखाया जोमैनिफ्राय- थरथिँ थरथिँ आंनि मेगनाव मोसादोँ बिखायाव बिफां बिलाइनि। 547 समनि उनाव सम आगान आगान लामायाव, फैसालि हरै थांखिसिम। 548 गुफुर जोमै दखरसे हाजो सेर सेर- आंनि गोसो, मेगन बोलाङो। 549 जोमैया हज्रिख्रावदोँ खोमसियाव फ्लाम फ्लाम मोफ्लामना, नुयो मोदै रथ रथा। 550 रिहरदोँ सानजानिफ्राय- सोरां गोग्लैदोँ बुहुमाव; फैसालि हरै सोनाबहा। 551 बार बारबोदोँ- रैसुमै गोदै, बे बुब्लियाव; थरथिँ गोगो अखा अखा। 552 थाथ'आ, सान्दोँ- अनसुलि, खुसि रैसुमै, नंथारगौ बिखानि। 553 आंनि जिउआव- सोरां साथिनाय, अखाफोर बिमानि नै गोरबो। 554 नारब्लांनाय खिरखिजोँ - खारसन फैदोँ बारआ, नारख्लायदोँ एमाव गुसु गोबाना। 555 गांगा थपा मोसानाय लाजिगुसु दाउसा मोख्रेबाव, आवा फावा आं नुयो। 556 रावबो गैया अखायाव समायना मोसानाय बारनि, आं नुयो समायनासिन। 557 बाजारि अखानि मोसानाय नैबे सानसुनि- आंखौ गोबाख्रबो सोलेराव। 558 मोखांआव दै- मेगनजोँ नुयो आयनायाव, अनसुलि खुदुमनाय। 559 फुंनि गुसु सुदेम बारा खोलो खोलो मोदोम बिलिरदोँ, सानजा अखोरांनि जारौ साना दुंब्रुद खुदुमदोँ; आं जोबोद खुसि गोसोआव। 560 मिनिदोँ- मिनिनांगौ जानायाव, गोजोनदोँ गोजोन्नाय मोनदोँ। 561 आं हास्थायो- अखाफोरनि गुसु निहोर, नैबे दुंहाव सोलेराव; दानसोरां हरनि समाव। 562 गोसोम हरनि मेंग्लिनाय खोमसियाव आं आरो अनसुलि बार, जोँ सिरि सिरि। 563 सोलेरा मेँग्लियो रंजानायनि उनाव नैबे दिनै मोकथांआव, आं बिजिर मोनो सोरां मिनिनाय। 564 बारनि अनसुलि बिलिरनायजोँ गोजांस्रिउदोँ आं फोजोँनाय मम, समायना मोसानाय आं नुयो। 565 बार बारदोँ अखाबो हादोँ सुदेम मिनिसुलु बिफांफोरा मोसादोँ, नै आं नायहरदोँ। 566 मटरनि खोरखि मोखांजोँ समायना समायना आं नुहरो- बिफां-लाइफांनि आखाय सोमाव हरनाय। 567 मासे दाउस्रिया मुसुरदोँ थिँ उखुमाव, मासे दाउलुरा मोसादोँ आंनि मोदोमपुल बिफांआव, आं गोमो हाबो समायना। 568 गोनां फोथारनि गांसोआव दुब्रि बिलाइनि मिनिसुलुनाय, गेजेर गेजेर समायना समायना। 569 गा देँखो बोनानै दाउखा मासे बिरलांदोँ- खोमसि अख्रांनि बिखाजोँ। 570 गोसो, गोसोआ बिरलांङो अनजालिनि देरासिम- मिनिसुलु आं फैफिनो। 571 थाबायदोँ नैबे बेलासियाव दैस्लुं गोग्लैनाय लामाजोँ सुदेम बेलासि बुब्लियाव। 572 आं हार्सिँ, नैबे बाराव, खोलो खोलो बिसोर आंजोँ गेलेयो। 573 रिमोनला अखा हादै मोदोमाव जगजोँ लुयो, आं गोजांस्रिउ मोनो। 574 आंखौ दा रायदाव थाम्फैफोरखौ आं बुङो- बिसोर गले गले फैयो। 575 गलाब बिबारि बाहां सिखिरि बेरे, नैबे सुदेम फुंआव। 576 आंनि जिउआव बोहैनाय रंजानाय गाबनाय बेनो बेयाव आंहा गोजोन दं। 577 आंनि गोसो, - नै खारलाङो हाजोआव सानस्रियो लैथोआव आं देरहायो। 578 बिबार नोँ लाजिदोँ गोसोजोँ आं सोङो बियो बारजोँ मोसायो। 579 आं गोसोखौ दांग्रोमो आंनि गोसो खथायाव खोमसिनिफ्राय बरननो। 580 मासे सिखिरि बिरलाङो गांखं बायनाय- मोदै गसर लाङो। 581 मोनाबिलिनि अखाफोर आंखौ नायहरो- खुदुमगौ नङो आं। 582 मिथिँगानि गेजेराव, आंनि गामि जायराब जायराब देरा बेयाव आं गोजोनो। 583 मोब्लिब इलेक्ट्रिकनि सोरां सौग्रावो आंनि मेगन; आं नायगङो। 584 आं खन्थाइ लिरो आयखौ गोसो खाङो आयनि खुदुमनाय। 585 आंनि लान्थि सोलेरनिफ्राय थरसे हिरा, अ'- बियो सोलेरनि दै। 586 दा आं मोन्दाङो आं उन्दुना दं, सिखारनो नाजादोँ फुंआव। 587 मासे दाउ बाफैयो आंनि गोथां मेगनाव समायना दालाइ-बिलाइ बिफां। 588 आलायारण- सोमखोर फुंआव, फुंनि रैरुब सान सिखोला। 589 गोसोनि बैसागुआव अनजालिया मोसायो, आं गोजोन हाबो। 590 गावदां अखाफोरा लाजिनाय, थाखोमायो; खोमसि जोमैनि सेराव। 591 नायहरो दाउसिन आं औवा बिजौनि, मोसानाय मुहिनि गोनां। 592 ख्लिँ-ख्लिँ-ख्लिँ कलेजनि बेल रिङो, समा जाबाय; आं लजिँ फारसे थाबायो। 593 जोबोद गुसु अ' दायो अखा हादोँ नायहरो आं खोरखि खेँना। 594 हे सोरजिगिरि- आं रंजानि, आंखौ नायहर आखाय खबनो हागौ नोँ। 595 सिमां नुयो, सिमां नङा बियो- आं सानहाबो। 596 नै नायहरो- गावदां अखाफोर, जोमै गैयै अख्रां। 597 नोँ गिदिँफिनबाय- उन्दुहाबनायनिफ्राय नै, देलायलाय मिनिसुलु। 598 गोमोनाय नैबे बुब्लि गोजाम बिसम्बिनि- साया माया मेगनाव। 599 खोमसि आरो खेबसेबाव मोब्लिब इलेक्ट्रिक गोमोरनाय, आं उन्दुहाबो। 600 सुदेम बार नैबे दैसा सेराव, आं गोजोम हाबो। 601 बेलासि बेलासिनि सम आं आयखौ लोगो मोनो आं खुसिनिफ्राय खुसिसिन। 602 थैबाय आंनि गोजाम सिमां, आं फोथांना लादोँ- गोदान मिजिँ गोसो। 603 नैबे मोनाबिलि- हाथर्खि ओँखार बोदोँमोन हाजि हाजि मिनिनानै। 604 फुंनि गोगो अखा बिसोरो रंजा होयो- जोबोद नायनो समायना। 605 सान्दोँ आं- दिन्दां अखाफोरनि खौरां आन्दायनाय हर गेजेराव। 606 दिनै नैबे फुंआव बार सिरिसे बिलिरफैयो आं लान्थि बायजोआव।