थिरिँ बिरिँ 91-147

91 थिँ थिँ सान्दुंआ दुंनो हमदोँ बरायनाय मेथाइजोँ रेवरेवा गाबदोँ, सहायथावै सोलेरनि दुंनायाव उसु खुथु जादोँ दान्दिसे बाख्थाबनानै देँखो बोनायखौ थाद' थाद' नागिरो आं बेन्दोँ बिफांआव। 92 मेगनजोँ सोरखि लाङो नुफा माफा बिसोर बिरलाङो, नायहरो आं रोमै रोमै। 93 गोसो गांखंखौ बुब्राबो बोलो फोराना बाज्ल'यो, आगोर मोना गोरबो आयनायावल' हुरा हुरा फ्लाम मोदानो। 94 नुहरनाय जोमैया दिन्थियो मेगनाव बेयो आलो आलो गोजावो, थिग आंनि गोरबोआव जिरि जिरि सानस्रिया राननाय गैयै बोहैयो। 95 गोसोआ आंनि मानोबा बिरथिङो हुरा हुरा माखौबा सानथिङो, अनजालिनि रादाबा लुफैयो सिमांखौ। 96 जोमैनि सेर सेर हरै गोसोनि मेँरोङै दाउथुआ बिरो नायहरै मेँहाबना दान्दिसे जग्रबो मिजिँआव सौहैनो बिरखाङो। 97 हाबिलानि दरखंआव बिबार बारि गोसोआ बाज्ल' बाज्ल' खागौ नङो सिमानि जेवराखौ आं बारनो हाया बिरखांनो गांखंखौ आंदि साजायो। 98 अनजिमानि दानख'थि गोरबोआ एब्रे एब्रे नागिरो मिजिँआव बिरबायना होसोयो मिथिस्लाबै हां थोनो मेँहाबना गोग्लैयो गोजोन्नाय मोनो अब्लाबो दान्दिसे नायहरै। 99 मिथिँगानि महराव मेगना गोग्लैयो सोमखोर जोमैखौ नायहरो, जारौ जोँमाया लाजि गुसु फासिनि दौलेँआव दिन्दाङै बियो नाथाय गोरबोआव मिनियो। 100 गोरबोआ गुदुं रंजानायाव गोजोमो हांखुर जाना लामायाव हान्थियो, दान्दिसे मेँख्लाबना फैफिनो आं गोजोन देरायाव नायहरो फैसालिखौ। 101 दादा दिदा सना जोँख्लाबदोँ नोँनि गहेना मेगन रिफिनाय गोरबोआव, आं रंजायो, आं गोजोनो। 102 अनजालिनि खौरां आं सानहाबो दोबै दोबै गोदोयो- हरखाब आयआ लिँहरो आंखौ। 103 खोमसिया साग्लोब फैयो गोसोआव सिरि सानहाबो हुरा हुरा रंजाखाङो गोदान सानखौ। 104 फाख्रि उन्दै दाउआ बिरबोयो मेगनखौ बोलाङो दान्दिसे मुसुर लाङा रैसुमै। 105 समायना गाड़िया एमब्रा बोयो हरखाब बागदाव होयो आंखौ- गुरलाब मोनखाङो सानस्रिया। 106 समायना अखाफोरनि मिनिनाय मिलियो आंनि गोरबोजोँ मिनियो लोगोसे लाजिस्लु। 107 अखाफोरा दिन्दां दौलेँआव थेवबो मिनिस्लु बेसेबा रिथि रिथाव हार्थखि। 108 अखाफोरनि सोरांआव गोजोनो मिनिस्लु जोजांस्रिउ आं खोलो खोलो स्राय बार निहोर। 109 गोमोथिँ गाबनाय रिङो मिजौखांनाय सानहोयो गोरबोआव, हाथास जायो आं मिजिँआव। 110 सना जागोन साननायनि लु मिजिङा गोजोमनाय बेरे मोदैनि, थाथ'यो आं गुसु बाराव। 111 उन्दै थरथिँ निहोरा गोग्लैयो सुहाबना खर'आव बिलिरो गोदान मिजिँनि सानहोयो, गोजोन्नाया हाबाब बहा खारो? 112 माब्लाबा आं मोन्दाङो बेयोदि आंखौ मोजां मोनो, आं सानो बेयोदि सासेल' लोगोथार। 113 खन्थाइनि सेर सेर गोजोन आंनि जिउ रंजायो गोरबोआ मिनिस्लुनाय। 114 फोरोँगिरिनि फोरोँनाया गोरबोआव नाजायो लाखिनो अराय गिदिँ गिदिँ नागिरो। 115 कलेजनि लांगोना मोनबाय समायना फरायसानि गान्नाय जोँमानि मिनिनाय मोदानो। 116 समायना बिबारा मोदै हुगारो बेरे सिखिरि बिरथिङो स्राइ स्राइ बारजोँ मोसायो। 117 दुब्रियाव गुसु निहोर रायदावो मिनिस्लु मोखांआव गोजोन गोरबो सुहाबो। 118 बारा मोसा लांबाय सिरि थाद'यो मेँहाबना नायहरो बिफांफ्रा गोमजोरै। 119 आनजादनि समा खाथियाव मेँग्लिना थायो गोसोआ, हुरा हुरा सानस्रियो हार्सिँङै सिमांनि लैथो मुलुगाव मेँनाय जेन्नायनि नेरसोनथि गैया। 120 नै-दा अखाहा दुखु गैया, बिसोरो मिनिदोँ- रंजादोँ बिसोर। 121 गिरि- आं उन्दुलांनि हगारदो लामा सोर्गोनि; खेँदो फांथेनाय दर्जाखौ। 122 नैबे गोदान फुंआव आंनि गोदान जोनोम, थमेन थमेन बिबारनि मोदोमनाय; समायना महरनि गेवलांनाय सिगां। 123 हानजा मोनसे हरनि बिबायारि थै मागिफैदोँ नै- खोमा गुदियाव दिखार गोनां। 124 सोमखोर गांसोआव, आंनि आफा दावदै; मेव मेव मोनो। 125 गलाबनि थफिनाया मिनिसुलु मिनिहां मिनिहां, बियो सना लाजिगुसु। 126 सिखिरिनि बिरबायनाया मेगनखौ बोलाङो- बिबारनि मोखांआव आंनि मेगन। 127 गुसुआव गोग्लैयो सोलेरा आं सानहाबदोँमोन। 128 मिथिँगानि खुसियाव बिसोरो रंजादोँमोन, मेथाइ रोजाबनानै; बिसोरबो गाबदोँ दुखुआव। 129 सोरांमोनै खोमसियाव आं सिरि मोन्दोँ, दावहायाव जेन्ना सिमांनि। 130 दाउस्रिया खेबलायदोँ आंनि मेगन सिगांआव, अनथाव बाथाव बिसोरो- बहा लोगोसे बिरलांफिन्दोँ। 131 रावबो गैयै नैबे सानसुआव आं, अनजालि; जोँ सानैजोँल' गोसोजोँ गोसो रायज्लायदोँ। 132 गासै रोजा खोमसि हरावनो आं नुहरदोँ जोमै सिंखावनानै- थरसे हाथर्खि, थरसेल'। 133 लाखोमाना दं अखाफोरखौ गावनि आन्दोआव, हाबाब अनसुलि जोमै- हरै बोलाङो फैसालिखौ। 134 दोम थाथ'यो आं, नायो- समायना बारजोँ मोसानाय बिलाइ। 135 मन्दिर गोसोआव, आं सिबियारि गोसोनि- सिरि सिरि आर'ज रोजाबो। 136 सुदेम बार बारदोँ गले गले खुदुमो बिलिरो अन्नायजोँ आंखौ, आं उसु खुथु जायो। 137 सिमांआ आंनि, आंनो सिमां नुदोँ- मा समायना सोर्गोआव। 138 गावदां अखाफोर, मुलुगनि अख्रांआव; मिनिसुलु मिनिसुलु मिनिहरदोँ। 139 उन्दै समाव नायहरदोँ आं आयनि दखना रोबै हमना जोँसार रिथि रिथि हाथर्खि- नायहरो नै गोसो खाङो। 140 दिनै अखाफोर गैया अमाबस्या खोमसि हर, आंबो हार्सिँ सिलायाव दरसि। 141 जोमै गैया अख्रां, बार गैया मुलुग, आं गोग्लैसोयो लैथोआव। 142 आंनि खथायाव आं नुयो- गोमोथाव बेमा सोँनाय। 143 थाबायो लामायाव, नायहरो सिगां फारसे- रायदावहरो अनजालि मिथिँगा नायहरो समाव रमायना। 144 आंनि अनजालि रैसुमै बियो हार्सिँङै- नै निरिबिलि लामानि सेराव। 145 समायना सानस्रि अंत नुयो- फैसालि अख्रांनि नखथ्र जोँथि आलारि। 146 दा आं, आं हार्सिँ बिरो सानस्रियाव, सिरियै- आवरायो खन्थाइ गोरबो बिलाइयाव। 147 लंथं सानस्रिया दा सुखुआ सुखुआ- लोहाबो दैयाव, गिदिँ फैयो।