दाउथु नोँ बिरबोफिनदो
R
Ronjoy Brahma
0
Altın Yaprak
अख्रांनिफ्राइ थल्थब गोग्लैफैया मोन्थाइआ
जोमैयानो गोबाख्रबनानै लाबाय थायो,
सिख'नानै लाबोनांगोन आखाय फोलावनानै;
हादोरनि सिखावफोरा खावबाय थायो
मोनजारोङैफोरनि थै सोलेरनि गोलोमदै।
जोँ सिमां नुयो जौसां गाखोनायनि
सारि सारि आखाय हमलायनानै मोसानायनि,
आरो हालुवाफोरनि दुब्लिया रोजाबो दिनै
सोमखोर बिफां बिबार फिथाइनि थाखाय।
मेथाइ रोजाबोमोन जोँनि गामिनि लावखारफोराबो
गोजोन बारखौ मोसाहोनो सिफुंनि देँखोआव,
साल-माखु खुयोमोन सिख्लाफोरा
मिथिँगानि समायना सावगारिखौ हमथानो,
मिथिँगानि गोथां आगरानो दिनै खारखोमाबाय?
आंनि लोगोफोराबो बैसागुखौ खारखोमायो
दा बिसोर रंजायो आयनि आन्दोआव,
आयआ बिसोरखौनो जोबोद लाजिखाङो।
दावहाया जाबाय थायो आंनि लागोआव
गावजोँगाव जे एबा हाद्रि सारलायनानै,
बेबादिखौ नुनानै दाउथुआ बहाबा बिरलांबाय?
उदांस्रिखौनो गले गले फरायदिनि
बे खोमसिनि सिलायाव बाथि फोजोँनानै,
बै समायना साननि बुहुमखौ आखिनानै
गोजोनै उन्दुलांदिनि अक्सिजेन गोबानायबादि।
सानस्रिखौ नोरजिया दाखालाम खन्थाइनि थाखाय
खन्थाइगिरिफोरनि गोसोआ जानो बेबादिनो सानो,
नोँनि मिलौहाब मेथाइनि दौलेंआव
नंगौ उदांस्रिनि मोदोमफ्रुनाय बिरबोदोँ,
लह्रायलांबाय लोगो खोमसिया लह्रायलांबाय;
दाउथु नोँ बिरबोफिनदो जोँनि लागोआव
Bu şiiri puanla
Henüz puan verilmemiş