Under der linden (Codex Manesse)

Vnder der linden an der heide da vnser zweier bette was da mugent ir vinden schone beide gebrochen bluomen vnd gras vor dem walte in einem tal tandaradai schone sanc dui nahtegal. Ich kan gegangen zvo der ovwe do was min friedel komene da wart ich enpfangen here frowe dc ich bin selig iemer me. er kuste mich wol tusent stunt. tandaradei seht wie rot mir ist der munt. Do hat er gemachet also riche von bluomen ein bette stat des wirt noch gelachet innekliche kvmt iemen an dc selbe pfat bi den rosen er wol mac tandaradei merken wa mirs hovbet lac. Das er bi mir lege wesses iemen nvn welle got so schamt ich mich wes er mit mir pflege niemer niemen bevinde dc wan er vnd ich vnd ein kleines vogellin tandaradei dc mac wol getruiwe sin.