La guerra di pret

Canti la guerra santa e i breviari, I piatt, i micch, i péccher, i peston, I callott, i barett, ch’è sgoraa in ari E han gibolaa la cerega e ’l melon A vintiquatter pret che in cappa e vesta Celebraven a tavola ona festa. O gran pader di vers e de la bissa, Promotôr di baruff e di legrij, Ti, che a costor te gh’et scoldaa la pissa, Scoldem anch mi, te preghi, i scinivij, In manera che possa famm onor Con di limm, degn de mì, de tì e de lor. El dì de Sant Lorenz, a on sit de fœura Quatter pass de Milan, se fa on feston In onor del gran sant cott in brasœura 1 fustusc de la gesa hin, confession, Panegirich, campann, mess, sinfonia E decott de cacao in sacrestia. Ma on compadron del sìt, ch’el vœur moccass Tutt i indulgenz che se despensa in gesa Senza mettess al ris’ c de confessass, El ghe regalla ai pret, a tutta spesa, On disnaron sui moli, che je trà lì Incojonii mezz mês a digerì.