La colazion

Oh don Peder! — Oh el mè don Romuald! Come staal? — Stoo benissem mì; e lù? — Discrettament anch mi — Sèntel sto cald? Marcadetta se’l senti! no en poss pù; Rivi adess de l’offizi a Sant Caloss, E son bagnaa che pari staa in d’on foss. — Là, donch: che ’l vegna chì, se l’è sudaa; Chì, chì, lontan de l’aria, el mè don Peder — Grazie tant! — Hai giamò cicolattaa? — Nò signor, hoo bevuu on agher de zeder Con dent on para de bescott del gerlo — Mo bravo lù! la colazion del merlo! Bottega!... el cicolatt! — El fà beli dì, Don Romuald, a scœudes i caprizi: Lù el guadagna, lù el va de chi e de lì; Ogni bott lù el pelucca on quai offizi; Ma mì con quella messa di des ôr, Hoo pari a sbatt, no me capponi on bôr. . . . . . . . . . . . . . . . . . . . . . . . . . . . . . . . .