Der Babst mit dem Kind

1. Hört wie in engelande Ein wunderschöne junckfraw was, Als ich in der cronica las, Gen der in lieb entprande Ein doctor mit pegiren. Der sie in mannes kleide Mit im hinfueret gen athen Auf die hochschuel solt ir versten Al da sie alle peide Thetten fleysig studiren. Das weib wart wolgeleret In allen künsten sie drefflich zw nome. Der doctor hochgeeret Zog mit seiner liebhaberin gen rome; In mannes cleid sie vnerkant Alle doctores vbervant, Ir preis das wart gemeret, 2. Das ir alle prelatten Sprachen lob, er aus rechter gunst; Durch irr sinschicklikeit vnd kunst Wart sie nach diesen taten Zw einem cardinale. Als nun leo der firde Starb, da wart sie zw babst erwelt, Johannes der achte geczelt; Also das weib regirde Das bastum nach der wale. Der doctor vorgesprochen Wont stet pey dem babst seinem schönen weibe. Kurczlich ir freüd wart prochen, Der heilig babst, der wart schwanger von leibe. Sein leib wuchs ser gros mit der zeit, Doch verparg er sein schwangerheit Auf neunundreissig wochen. 3. Vnd als der babst mit prangen Mit all seinen cardinelen Wollt in sant johans kirchen gen, Wart er mit we umfangen Vnter des himels wolcke. Vnd da ein kint gepare Jdoch starb er schmerczlich daran Alda erst sein weiplich persan Wart also offenware Allem romischen volcke. Also wurden geplende All cardinel vnd romische prelatten Durch weiplich list pehende, Die sich zw lecz veriet mit offen tatten. Also wo noch heimlich schalckheit Verporgen pleibet lange Zeit, Wirt sie offen am ende. Anno salutis 1532 gedicht am 29 tag marcj.