आं मेथाइ खनो सिरि सिरि

दिनै मोनसे सिमांआ सिरिमोनदोंमोन कम्बल गिजिखौ थुब्ला बिसिखावनानै, दाउदैनि बिखं सिफायनानै दाउसाया हायाव थब थब आदार खनजानायबादि। दैमा-दैसाफोरा गोबालायो गावजोंगाव उन्दै-गिदिर दोहोनि-गोरिब सान्ना दुगाया बिसोर, थेवबोदि हर आरो साननि आखुफोरा जुदा जुदा जेरै सान थाब्ला हर गैया, हर थाब्ला सान गैया। समाजखान्थि, नोंखौ रांखावरि होसिन्नानै जुब्रा खालामदों दिनै गोसोम फालांगिरि, नेमखान्थि, नोंखौ सिलाइ फाथिनानै दिनै राजखान्थिगिरिया बानायो गोदान नेमखान्थि। दुंहाव बारजों फैयो आरो थाङो हाजार बिदिन्था गिलिर मोनाबिलियाव नुजायो थुब्रासे दद्र हाथर्खि, थेवबो गामिनि आइ आरो आफाया सानदों- हाब्रुआव फामे बारफैथों, अरनाव गलाबा बारथों। लखाबाव बोरायनाय आदानि थाइनै मेगननि मोदै आंनि खन्थायाव इनायनो सोदोब होयो, आदा! नोंनि सिमांखौ लानानैनो लिरगोन आं खन्थाइ गोजोननि बारआ फैथों आइनि गोबाय बारान्दायाव। गोथां खायमा अख्रांनि जारौ सान्दुंआव गोमालाङो खोमसि, अखाफोर आरो खैखा हाथर्खि आसारनि दुब्लियाव बोलो फोरानानै साना होख्रावनायबादि आंनि मेथाइया हांखुरै स्लगान होयो सोरां नांगौ होननानै।