आंबो सिखारबाय

आङो आथिँ मुसुर जेन्नायनिफ्राइ बेमा खांख'माफोरा आंनि सान्थ्रिमोन। आङो लाइट् खोमोरनायसिम मायनाव न'नेमामोनहा आदार नागिर नागिर जाबायदोँमोन। आङो गोदो गोदो उन्दुलांनायसिम अंखि थाम्फैफोरा आंनि देँखो होग्रामोन। आङो सिरि मोन्नायसिम आंनि सान्थ्रि मन्थ्रि गासैबो दो दो उन्दुलांदोँमोन। रावबो मिथियै एनजर इंगिनिया गाग्लोबदोँ गोरिब मासे बेमाखौ, सिबाय हरफा उदै रान्दोँ बेहा। इंगिनिनि उदखाराव न'आ फाहं जालांदोँ, नै बेखौनो सोरांस्लाब मोनै गोसो होना फोसाबबायदोँ बेमाया। मिथिँगानि दाउसिन माखासेया सिला सिबदोँ, जिब-जुनारफोरा खिस्रां हासुस्रां खालामदोँ। सैमा मावजिफोरा हाथाइ मानजिदोँ, जिबौ नेवलाइमोनहा थांदोँ- हराव गावसोर सानाय दांख्रेब खैसारखौ बोखांनो। हरफा बादालिजोँ उन्दुनो होजायै गांराव राव थालिर बिलाइया नै थेनथ'ना खेबसे मोदोम सानेरदोँ। साना फैथारबाय खाथियाव मुलुगनि गासैबो खुसि, आर'जलाइ होनो, लोगो हमनो बिसोर दा देलाइदोँ गाव गाबागाव।