अरननि दाइरि 5.06 खुसिया आरो सिरिथा

1097 आलो आलो अरननि बिखायाव सिरिथाया लाइमोन सिख्ला जाबाय, समायना सुदेम मिथिँगा बिखायाव गेले गेलेयै सर सान बारहोबाय। 1098 अराय खुसिजोँ बुंफबनाय गोरबो बेसेबा सोरां बिनि मोखांआ, नायनो समायना गेवलां मुस्रि बेस्रां बेस्रां बिनि मेगना। 1099 अरननि सिख्रि सिख्लाबादि गांखं फुवारो बियो बेसेबा गोजोन अरननि बारजोँ, बियो राजखुंग्रिबादि अरननि सिख्ला गावनि गोसोबादि बियो रोजाबो। 1100 बिरबाय बिरबायै दाउसिनफोरनि सेरसेर दुलाराइ हाजोनि समायनाखौ नायो, अरननि जिब-जुनारफोरजोँ खुसियै गेलेयो खैफोद गैया दाहा गैया जेब्लाबो। 1101 बेबादिनो सोमखोर अरननि बारा खोलो खोलो जेब्लाबो बारो, सानजानि जारौ सोरां साना बुहुमजोँ फायखन्ना जेब्लाबो सोरां खोमसि। 1102 सानसेखालि बियो हब्रा हब्रायै खैफोद गोनां जुनारनि गाबनाय खोनाबाय, सिरिथाया अब्ला गोख्रै खारनानै गाबख्रावनाय जुनारनि सेराव थांबाय। 1103 सानाय आरो आलौनायजोँ मैया गावनि आथिँ जोब्राबना गाबदोँ, गंसे जिलिदा बिनि मोदोमाव सोरखि लायजासिनि हाबनानै दं। 1104 खुसिया जोबोद रंजानायजोँ बिखौ होसोदोँ सिरिथाया सफैना बिखौ नुबाय, गोमोथाव जोहोलाव खाफाल गोजोँ मदद जांगिला आरो गथा सोलेर। 1105 सिरिथाया बिखौ नुनानै गोमो हाब्बाय बिनि आखायाव बोरला जिलिद, बियो बे मैखौ गोसो होना गावदोँमोन आरो उन उन होसोबोना थाद'फैदोँ। 1106 सिरिथानि मेगननिफ्राय मोदै रय गबाय बे जोहोलावनि बिखुंआव जिलिद नुना, बियो जोखोम जानाय मैखौ बामनानै हाजो फारसे गोख्रैनो बिरलांबाय। 1107 खुसिया जोहोलावआ अब्ला आन्दायबाय मैखौ सिख्लाया लानानै थांबाय, आरो लांफाबाय गंसे जिलिदखौ अब्ला बिनि बिखुंनि जिलिदा खामानि होलिया। 1108 मैहुर खालामनो खुसिया हालिया बियो बेसेबा दिखार नांबाय, बियो थाख्लाय दैसा सेराव फैनानै बे सेरावनो खाफाल हमना थाबाय। 1109 दैसानि जिउ-जिबिफोरा नुजाफैनानै बिखौ गल' गल' नायफैबाय, दान्दिसे उनाव दैसानि खैनासान्तिया बिनि सेराव नुजाना बुंफैबाय। 1110 फिसा नोङो बे जिलिदनि दाहायाव बेसेबा खाराव माराव गाब्बाय, नोँनि बेबादि गाबनायखौ खोनानानै आं नोँनि मोदैखौ हुगारनो फैबाय। 1111 खोनासं नै आंनि अनजालु फिसा नोङो बे जिलिदखौ लायफिन, हाजो मावरियाखौ बारलांनानै मोनसे दैसा सेराव नोङो मोनहैगोन। 1112 नाथाय खोनासं फिसा नोङो बे अरनाव रायखस लोगो मोनगोन, बियो मुलुगखौ फोजोबनो हानाय रायखस नोङो बिखौ सोलोजोँ एरायलांगोन। 1113 रायखसा दा गोदो गोदो उन्दुलांदोँ बेन्दोँ बिलाइफोरा बामख्रबना लादोँ, बिखौ फोजानो नाङा दानो नङाब्ला बियो उखैनायाव गोग्लैगोन। 1114 जेब्लानो बियो आदार उखैयो अब्लानो बांद्राय हामला खालामो, नोँनि बोरला जिलिदजोँ बिखौ नोङो सानसे गावथार नांगोन। 1115 जाय जिलिदखौ सिख्लाया लांदोँ बे जिलिदानो रायखसनि बिस, बे जिलिदखौ नोङो लायफिन नांगोन सिरिथानि आखायनिफ्राय मोजाङै बिफिन्नानै। 1116 बेबादि बुंनानै खैनासान्तिया हरखाबै दैसायाव दोबै लांफिनबाय, राहा मोन्नायबादि मोन्नानै खुसिया रोजा अरनखौ सिँखावनो हमबाय। 1117 बेसेबा गुदु आरो लामा गैयै जेरैबो आन्दायहारा गुसु अरन, जेब्ला हर जायो अब्लानो खोमसि बेबादिनो खुसिया बेवहायनो उन्दुनाङो। 1118 जायै लोङै खुसिया अरनाव गोबां सान हगारहरबाय माब्लाबानो, सम सम बियो बिफांआव गाखोना नायहरबाय नाथाय जेरैबो लांदां नुहराखिसै। 1119 ओजोँ सिरिथाया हाग्रा मुलि होनानै जोखोम जानाय मैखौ फाहामबाय, खुसियानि बोरला जिलिदखौ लानानै गोसोखौ दुखु खालामनो हमबाय। 1120 दाउसिन दाउलानिफ्राय जेब्लाबो बियो खुसिया जोहोलावनि खौरां मोनबाय, मोनसे समाव खुसिया दुखुजोँ अरनाव आरोबाव होख्रावना सान बारहोबाय।