अरननि दाइरि 5.07 जाम्बा रायखसनि खुगायाव

1121 खुसियानि खौरांखौ सानसेखालि मैना दाउआ सिरिथानो खिन्थाना होफैबाय- सिबाय जोहोलावआ जिलिद गोमानायनि दाहायाव बेसेबा दुखु खालामनो हमबाय। 1122 बियो अरननि फिथाइ-सामथाइ जानानै सान हर दुखुजोँ सम बारहोबाय, नाथाय बिनि दुखुआ दाबो जोबलिया बिनि मेगनजोँ मोदैया रानलिया। 1123 बियो हराव गिरगिर अर फोजोँना अरनि सेरावनो उन्दुना थायो, बिनि देहाया जोबोद हामलांबाय बियो बेसेबा दुखुआव गोदोयो। 1124 दाउ मैनानिफ्राय गासैखौबो खोनानानै सिरिथाया अब्ला दुखु मोनखांबाय, बियो दाउखौ खुसियानो खिन्थानो बुंबाय बेबादिनो दाउआ खुसियानि सेराव फैबाय। 1125 गोदो गोदो उन्दुलांनाय खुसिखौ दाउसिना फोजानानै लासैनो बुंबाय- नै जोहोलाव नोङो जिलिदखौ मोनफिनगोन नोङो आंनि उन उन फैदो। 1126 सिरिथा सिख्लाया लानानै दं बियो नोँजोँ गोबां बाथ्रा रायज्लायगोन, नोङो दुखु दाजा दागाब नोँनि घोनखौ नोङो मोनफिनगोन। 1127 बेबादि बुंनानै मैनाया गोख्रैनो बिरलांबाय नाथाय लोरबां देहाखौ लानानै खुसिया बिखौ आन्दायनायसै बेबादिनो बियो गोदो उन्दुलांनायसै। 1128 बेसेबा बोसोरनिफ्रायनो बे अरनाव सासे जाम्बा रायखस दंमोन, बियो हराव गिदिँबायो जेब्लाबो बिनिस्रि सिख्लाया बिनि फिसाजो। 1129 रायखसा नायनो हाथाइ हारावराव बिनि खिबुआव लानजाइ थेँफोद, बुद्रांद्रां महर आरो मुस्रि मोनामब्रुं गेसाव दाखोन गोनां सोलेर। 1130 खानाया बुद्रुनाय जायलाला बेसेबा खोमसि अरननिफ्राय बियो एब्रेना ओँखारबोदोँ बांबुला बांबुला मोसाबोदोँ। 1131 सिनायनो हायै हांगार महर फरायनो हायै जोबोद खोमसियाव, ब्लिँ ब्लिँ बिनि मेगना जोँदोँ बियो खुसियानि सेराव फैगासिनो दं। 1132 बिनि गोफार गोफार हाथाइआ लावनायनिफ्राय लावसिनदोँ आरोबाव, ओजोँ सिरिथाखौ खुसिया सिमां नुबाय बेसेबा आमाय जुमाय गोदो गोदो। 1133 बियो सिरिथाजोँ लोगोसे बिबार बारियाव मिनिग्लां खुसियै बेरायदोँ, समायना रमायना हाजोआव गसंना बायदि गाबनि मुलुगखौ नायहरदोँ। 1134 खोलो खोलो बार बारनाय समाव जिरि जिरि बोहैनाय दैसा सेराव जिरायना बिसोर गोसोनि बाथ्राखौ बेखेवदोँ गोगो दैसाखौ दहाय लानानै। 1135 गेवलां-गेवथां बिबार बारियाव दान्दिसे बिसोर बेरायदोँ, जिउनि गोरोबफ्लेनाय रंगिना सानखौ हालो-दैलो बारहो हरदोँ। 1136 रायखसा बिनि सेराव गसंफैयो गावनि गन्थंजोँ मोदोमनाय नागिरो, रायखसनि गन्थं सुनज्रोम बायनायाव हरखाब सिरि मोनो खुसिया। 1137 मेगन बिलिरना बियो नायो खोमसियाव सिनायनो हाया जायो, गोसोम मोनसे सायखं बियो सानो सोर बियो सिमां ना मोकथां? 1138 आंनि गोदो गोदो उन्दुनाय समाव सोरनि हरखाब फोजा फैनाय, अख्रांआव हाथर्खि थरसेबो गैया बारा जोबोद गुदुं बारदोँ। 1139 जाम्बा रायखसा गुदुं हां हगारना गावनि आखायजोँ बिखौ खनखाङो, ब्लां खोमसियाव खौगा सिनानै ग्लब मनयो बियो खुसियाखौ। 1140 हारा-मुरा दं रायखसनि उदैयाव हां मोना जायो खुसिया, जेबो राहा गैया जायो बियो राहा नागिरनानै द्रद्र थानांगौ जायो। 1141 खुसिखौ उदैयाव लानानै रायखसा बांबुला बांबुला थाबायलाङो खुसियै, बियो हाजो मोनसे बारलाङो बेबादि बियो थाबायदिङो। 1142 उन्दुनो ओँखारदोँमोन खुसिया नाथाय जेरैबो उन्दुनो हायाखिसै, गेसाव मोनामनाय जाम्बानि बाहान्दार बेदर गोथां ना खांख्रायनि दामोल। 1143 थैहां लोरला जायो खुसिया हां गहां जायो नाथाय गवा, आगोर मोना जायो लामा नागिरना होख्रावनो हमो बियो उदै सिङावनो। 1144 उनाव मैसो गंजोँ थुफ्लङो खुसिया नायगार नायगार जाम्बानि उदैखौ, रायखसा अब्ला ब्लां खौखा सियो थंब्लेद बारनो अब्ला खुसिया। 1145 बेबादिनो बिसोरनि गेजेराव बुलायनाय जायो खुसिया रायखसनि उदैखौ बोलोजोँ गले गले थुफ्लङो नाथाय हामफिनो रायखसा माब्लाबाबो थैरोङा। 1146 बुलायै बुलायै मेंङो खुसिया रायखसा बिखौ हमथयो, नाथाय खुसिया रिमोनद्ला जायो बियो गले गले बारगफिनो। 1147 उनाव रायखसा बिखौ गावनि खानायजोँ गोदोनायाव गोरायै खानानै होबाय, बोलो होनानै सिमब्रेब्लाबो आरोबाव खुसियानि बोलोआ थोआखिसै। 1148 नाजासे नाजाना मेंग्लिना द्रद्र थाबाय बियो जाम्बा रायखसनि गेजेन जाबाय, बेसेबा जिँगाजोँ गल' नायबाय बियो रायखसा मिनिनानै बुंनो हमबाय। 1149 आंनि उदैयाव जायनो जिबिया हाबो उदै सिङावनो बियो गलियो, लासै जेरैबो हां मोनै जानानै बे आदार महरै हजम जायो। 1150 नै खुसिया जोहोलाव नाथाय आंजोँ नारानाथा बुलायनो जुजिबाय, आंनि उदैयाव मुगासे बारलांब्लाबो राफोद आंनि उदैखौ थुफ्लंबावबाय। 1151 दानिया था नोङो बेयावनो आं नोँखौ खानानै दोनबाय, रसा नांनानै सानसे नोङो थैयोब्ला आदार महरै आं नोँखौ जागोन।