गायखेर गोसोम
R
Ronjoy Brahma
0
Altın Yaprak
गुबुनफोरा लोङो बुन्दै,
बिसोर लोङो मल मल मोदोमनाय रन्दै?
नङा नङा गायखेर गोसोमसो।
हावरिया बिमानि गोरबोआव
गोदानै गोरलै जोनोम मोन्दोँ,
देरै देरै बिनो-
गायखेर गोसोमाव अरथाबै अरथाबैनो
संसारनि थफ्ला गोबादोँ।
नोँसोर मिथिगौ ना मिथिया?
बैग्रि बिलाइनि साबोना साबसिन
एबा खोथिया थिलिनि हाब्रुआसो,
गंगा जमुनानि दैया गोगोसिन,
नङा नङा अमा मैसो फेखारिया
सानफा थोलो जेराव दुगैयो।
जोँनो साबोन थरसे नांगौ
बेखायनो सव्यं बिक्रमा बुंदोँ,
सार्कासनि क्लाउननि ख'साब खुनानै
मेचे दैसा, बुरलुंबुथुर दैमायाव।
गलाब बिबारनि थाव फुनदोँ बिसोर
थाइगिर बिबारनि ख्रिम,
नाथाय मेसेँनि हाद्रियासो
मिनि खुसि गोबाफैदोँ।
हांगारखौ सुनो नङा
गायखेरखौ सुनोनो नांगौ
थरसे हांगार गोसोम।
बर' बोरायनि मन्त्र आवरायनानै
प्रसेनजित ब्रह्मआ खनखांनाय
जिब्रालटरनि अन्थाइखौ
दानि खनट्राक्दारफोरा देख्रुबदोँ
रलार जामफारजोँ बुद्रु बुद्रु,
सिमाङाव गोब्रामनाय नङा बियो।
लखाबाव जोबनाय खांखिनि दाउखौ-
मानो बिरदावनो होनो?
अमायाथ' मानसिनि हाबा नङा
एवखु जोबगोन थारुन मुलाखौसो।
Bu şiiri puanla
Henüz puan verilmemiş