जिख्लाबसे लाइजाम: 'रैसुमै'नो 562-603

562 आं नोँखौनो मोजां मोनो मिथिगौ नोङो नंखाय नंनानै, आं गासै जिउ जिउ फैसालि हास्थायो सानैजोँ जेराव गैया हेँथा सुबुंनि। 563 हाद्रि साग्लोबनाय गोरान लामायाव नायहरो जोमै सोमखोर अख्रांआव, मिनिस्लुनाय महराव दं नोङो अ' गोबागोन आजावना बाज्रुमबा नोङो। 564 बे रादाब, साबसिन गैला आरोबाव बेनि बेयो गोरबोजोँ हामलायनाय, आजाव आंनि मोजां मोन्नाय। 565 गोरबोजोँ गोरबो हर हर अन्नायजोँ बाबेन लाङो, अंगुबैथार बजबनाय बिखानि दान्दिसे मेँग्लिना खोमसिया थांफिनो। 566 जुदि आं नोँनि सेराव फैयो समायना नोँनि महर नायगोमोयो, आं गोरबोआव मोजां मोनहाबो गासै नोँनि मुं मुस्रियाव। 567 दा नोँखौ सानबायै गोजां गुसु एरायलाङो, समायना सावगारि नोँनि नागिरनानै। 568 गोसोआ ओरैनो बिरबायाखै, नोँनि थाखाय मिजिँ साजायदोँ, बेयो मेथाइ आं गावनो रोजाबनाय। 569 नोँ जेब्लाबो आंनिनो गोरबोआव मुं मुस्रि नोँनि, मेगनाव; आं सानो जेब्लाबो नोँनि- नोँ सिथाबनाय आंनि बिखायाव। 570 आंनि साना मोदैजोँ बोहैयो गोबां दुखुआव लासै लासै, गारबोनाय खुसिनि सावगारिया आरोबाव थुंगेगोन खुसियाव? 571 नोँ नोँनि दर्जाखौ खेङाखै गावनि गोरबो बिखानि, साननि सोरांआव नोँ नुदोँ- नोँखौ हास्थायनाय आं सिरि सिरि आरो थांगोन मोजां मोननानै। 572 गलाबनि मोदोमनाय बिबारनि आंनि हास्थायनायाव नोँ बिरबायो, सेरनिफ्राय सेर खाथियाव अख्रां आंनि नागिरनायाव। 573 नोँनि आंनि गोरोबनायाव आंनि गासैबो मोजां मोन्नाय, गां गोनां बिरबायो नागिरनाया जोबनाय आरो सैथोआव। 574 आं अनसुला- नोँ आंनि लोगो लोगो नोँनि लामायाव आं, आजाव आंनि आजाव नोँ आंनि रैसुमै सना। 575 जेबो सान्नाय गैया आंनि गोरबोआ बुंगौ- नोँ आंनि।नोँ आंनि रैसुमै रावबो गैया नोँनि अनगा। 576 गासैबो मोजां मोन्नायखौ होयो, आं मिथिगौ बेनि जोबनाय जागोन जेब्ला जिउनि सल' आं खिन्थायो। 577 आं सिमां नुयो गोरबोआव नोँनि आरो रंजायो सान हर हाबायाव, आं सान्नो हागौ नोँनि- जेब्ला आं नोँनि मेगनाव नुयो। 578 नोँ आंनो मिनिनाय होबायब्ला नोँ आंनो मिजिँ होबायब्ला नोँ आंनो गोबां होबाय, आंनि मोजां मोन्नाय; आरो मा बिनो नोँनिफ्राय? 579 आं मिथिगौ, नोँ नुवाखै आंनि मोजां मोन्नाया लैथो, अख्रा आंनि हास्थायनाया। 580 रैसुमै, आंनि जिउ बिखानि नोँ आंनि सासेल' जिउ, नोँखौ आं जेब्लाबो हास्थायो, जिउ गोरबो जोबजासिम। 581 नोँ सासेल' जा आं सान्दोँ नोँ मिथिगौ नोँनि खावलायाव आंनि मेगन, आं गावनो मिथिया जोबनाय जागोन गावनि गासै नोँजोँ आंजोँ गोरोबनायनि। 582 मिथिँगानि गुदुं गुसु बोथोरा बिदिन्थानि हर खोमसि समफोरा बोथोर आंनि जिउआव, नोँखौ लाना खन्थाइ सुजुनो। 583 आं माबोरै बावगारगोन? माबोरै आं नेवसिगारगोन? मिथिँगानि गोरान गुसुसि साजायना, थागोन जोथोनै मिजिँ फिसिना। 584 दिनै हर गेजेराव हार्सिँङै उन्दु लाङाखै सान्नानै, लोगो नोँनो दं गोरबोआव गले गले बुरखायो अन्नायजोँ हां बोनाय हगारनाय समाव नोँ आंनि।नोँ आंनि सना। 585 आंनि मेगना बारनबोयो नोँनि आं मोजां मोन्नाय खुसियाव, जोबोद थाबायनाय गोसोआ मोजां मोन्नाय नोँनि नागिरनो। 586 नोँ आंनि हार्थखि अख्रांनि खोमसिया जेब्ला सानखौ फानफ्रेयो, नायहरो आं खुसियाव मोसानाय जोमै मेगन बिसिनानै मोदैया ज्राम ज्राम जायो सान्नायाव नोँनि अन्नाय आजावनानै। 587 नोँ आंनि मिथिँगा नोँ आंनि अख्रां नोँ आंनि सोर्गो खन्थाइ लिरो नोँनिनो आं। 588 नोँ आंनि साया जेब्लाबोनि नोँ मेगन आंनि। नोँ गोरबो जिउ आंनि। 589 नाथाय नोँनि बेखेवथि आरो साबसिन रादाय जिउनि हो आंनो आरोबाव बुंनो गोरबोनि नोँखौ आं असे गावनि सान्नानै। 590 हो आंखौ साजायनो नोँनि मुस्रि जिउआव बोजबनानै बिलिर बिलिर गोरबोआव गोजोन्नाय सेर सेर अख्रांआव। 591 मा जाखो आंनि सिमांआ बियो गोदो लाङो बुरलुंबुथुराव, बिमा दैजोँ गोजाव गोजाव आरोबाव फाख'नाव गोदोहाबो। 592 जेब्ला नोँखौ नुयो साजायनाय गोजा जाहाब लीप्षटिक गुसुथि नायनो समायना गलाब बिबार बोहैयो थैयाव नोँनि मुं बोहैयो मोदैयाव नोँनि महर मुस्रि, गासै आंनि गोजावनाय नोँनि- गासै आंनि गोदोनाय। 593 बारसेल' गलाब आंनि मेगनाव साया- माया गोजानावबो मेगन फैसालि रैसुमै मुंआ बावनो होआ आंखौ, - मोसा फैयो आंनि लामायाव। 594 गोबां बोसोरा बारग'लांबाय सम बिदिन्थाजोँ लोगोसे रुंग'बाय, गारबोनाय बिसम्बि नोँजोँ आंजोँ बावनो हाया दिनैबो, आरो बावनो? 595 समायनायै नोँ मिनिब्ला गोजोनो गोरबो समायनायै, जारौ रैसुमै नोँ रायदावब्ला लोगोसे बेस्रां मेगनै नायब्ला गोसोनि दरजाया मिनिस्लु गेङो। 596 जुदि आं सोङो गावनि मोजां मोन्नाय फोरमायथि नोँनि गोरबोआ लाजियो रैसुमै, नोँनि समायनाया बांसिनो। 597 मिथिया आंनि मोदैखौ बबेजोँदि बोहैदोँ निजोरा, नोँ आंखौ हमनो हागौ जुदि आंनि मोदैखौ सिनायगौ। 598 सोरबा सासे नोँखौ गोबादोँ जाय नोँखौ मोजां मोनो, आंनि गोग्लैनाया बेबो जाहोन नायहरो बबेजोँ बिरलांदोँ गोसोआ। 599 आं नोँखौ मोजां मोनो नाथाय मिथिया जोबनाय जागोन बबेव, दा बेसेबांदि थांखो समा- माब्लादि जागोन आंनि गोरोबनाय। 600 नोँ सान्नायनि लामायाव सौग्रावो नाथाय नंगौ हार्सिँनो बारलाङो, अब्लाबो नोँखौ गोबायो नोँनि मेगना बिजिरनो होयो गोरबोआव। 601 दिनै खोमसिनि मोब्लिबगासे सोरांआव खन्थाइ लिरदोँ नोँनि- रैसुमै फोरमायनाय नोँनि जिउनि- गोरबोआव गैया बेयोदि बेसे गोलाव सल' नोँनि थाखाय, गासैबो सम आंनि। 602 आं दिनैबो मिथिया मादि सान्दोँ नोँबा आंनि नंगौ नोँबो मिथिया थारै आंनि सिरि सिरि रैसुमै आंनि। 603 आं नोँखौ मोजां मोनगोन थैब्लाबो जोबब्लाबो, नाथाय नोँदि आंखौ एरायलांगोन अब्लाबो आंनि खन्थाइ थागोन नोँनि।