खन्थाइनि लोमजानाया जुरि जेनबाय

गोसोनि मेँनायाफोरा उन्दुलाङा बिफां सायायाव उन्दुलाङो खन्थाइनि मिलौहाब खबामावसो, नांगौ जानाय सोदोबफोरा गोरगोर खारबोनानै खन्थाइनि महर लाफैयोमोन दाउस्रि बासाबादि। गोसोनि फाफ्लियाव बाददिँख्लाय फैयोमोन आरो थायफ्लुं फिथाइबादि गोबाथाबोमोन, गोथां दुब्लिनि उसां गोरबोआव नाथाय बैफोर सोदोबफोरा समजोँ खारफानो हाया खन्थाइनि आथिँ सिंनि हाया गोमालाङो। मोदै लोँनायनि हाबिला जिउनि खबाम आयनि मोखांनि सायखंखौ होखारनो, आथिखालाव एम्फि फिदिँग्रा आंनि खन्थाया गोसो जायो खोमसि जालामानि बिगुर खुनो। आंनि खन्थाइनि दिखारा फोरमायो- मोदैनि लैथोमायाव रुगुं गैयै दिङा आयनि हाद्रि बेँखन्नाय लोरबां मेगन, मोदै हुगार हुगार दखना फालिया जिलाङो। आंनि खन्थाइनि बोहैनाया लैथोमानि दै नामा? एबा थोबसे बेलुननिल' बार आथुमसे, आयनि दाहा सायखंखौ होखारनो मा सावगारि बोनो? बेसेबांदि दुखुथिया दिनैबो बियो हाजोआव रज'नाय बिफांआदि गावखौ जौसिन सानो!