लामाया दिनै
R
Ronjoy Brahma
0
Altın Yaprak
लामाया दिनै जोबोद जेथो गोनां
बबेजोँ थांनो बबेखौ आजावनो-
संफ्लखौ सोबगासिनो दं सिगारेड्
दाबखाया बोबथाबाय थायो आथिँखौ।
सिबसन फैनाय बारमोदाया सोरनि थान्दै?
हुलुंहुथुं लानानै थांबाय उदांनि मोदोमनाय
गोरान बैसोमुथिया आजावबाय मोदै
अख्रांआ होसिनो जोँनि गोरबोखौ।
जलांनाय दौलेँखौ जरायनो सोर?
गाज्रि सिमां नुग्रा आंनि लोगोफोरा
थाबोबाय बहाबा आंनि सुलु लायैआव
गावसोरबो सुलुलानो सम मोनलिया।
आं मिथिगौ दिनैनि मोसाया अरथारदोँ
जुजिनो रोङै फामुवारिफोरखौ
हादोरनि खुंगिरिखौ आं मेगन थाइब्रै सानफ्लाङोमोन
बिसोर नुवाखिसै आंनि आयखौ।
दिनै आयनि दाहाखौ सिथारनो हालिया
गोदान फैसालिखौ बोलाथारनांगोन
आंनिनो आखायाव दं अख्रांआ
जेरावबो नागिरना मोना आरो बिखौ।
दिनैनि जोलैनो मेथाइ रोजाबनांगोन
गोदान जौथाइखौ बिसोरनि आखायाव गथायनो
दिनैनि गाराइखौ दिनैनो फाहामनांगोन
जेराव बायस्राया आखायमुथिनि अखोरां।
मासे गुफुर दाउथुनि गांखंजोँ
लोगोफोर दोँसे मेथाइ सुजुदोँ आं
लैहोर लैहोर लामायाव ओँखारबोदो
जयैनो खेबसे रोजाबना गोमसारहोनि
Bu şiiri puanla
Henüz puan verilmemiş