थिरिँ बिरिँ 241-290

241 बेरखांनाय गोसोनि रावआ गोदै दांसे खन्थाइ महरनि, सुजुयो बेखौनो रेबगनाव साजाय साजाय जोँनाय गैयै गहेनाजोँ। 242 सानसुनि दुंनाय जोँमानि मोदोमाव नाङो ज्रोम ज्रोमनो, साया गैयै गोलाव लामायाव जोँमानि मिनिनाय मोखांङाव। 143 बाज्लनाय गोनां मेथाइया गोसोखौ एवथुयो जेब्लाबो, हमथा हायै गोसोआ देहाखौ सोमावो दान्दिसे; ओँथि गैयै फोजोनो आं गोसोखौ। 244 जारौ जोँमानि मिनिनाय सोनाब फैसालियाव आनज्रो आनज्रो आंखौ सारफावो मोजां मोनहाबनाय नायहरो आं सना मोखांङै- लाजिस्लु दाउसिना दालायाव मुसुरदाव हरो। 145 नंखाय सानबाय थानाय गोरबोआव थे बेमा जेया लुफैयो फावसायनाय गैयै दोम थाद'यो आं, एरायो मोजां सानस्रि लामाजोँ। 146 गामिनि गोरान लामायाव हाद्रि थाबायनाय मोनफ्रोमबो आगान, सानदोँ आं मिजिँनि लामाखौ। 247 जारौ दुब्लि नारानि बिखायाव हानजासे गुफुर दाउब'आ बिरथिँङो बुब्राबनाय बिसोरनि गांखंआ बोयो मिजिँआव। 248 सानजा मोखां मोखां आं दुब्लियाव जारौ साना सोनाबजोँ, साया जानाय आंनि सायखंआ साननो होदोँ आंखौ दान्दिसे। 249 खावलाबसे गामिनि फोथाराव बुगदावनाय सेँग्राफोरनि बुलुरा गुरलुब मोनहोदोँ बिखाखौ। 250 लुन खुनाय हाद्रिया मोस्लेद खालामो मेगनखौ- दान्दिसे नायहरो आं अखोरांजोँ। 251 गोरबोआव साननाया मानखोफैयो लामा नागिरना थाङो दाउसिनफ्रा, जोँमानि मोदाननाय मेगननाव नांफैयो। 252 गुसु बारा देहायाव बिलिरो गोजांस्रिउ मोनखाङो सोलेरा, जाखाङो मुहिनाय बारआव गोरबोआ। 253 गुसु गोरबोआव बाहागो खौखाब मावग्लुबनाय गोजांङो बिरलाङो गोसोआ दुंबुर सोरां सेराव। 254 नायहरबाय थायो दान्दिसे गोजा जाहाबनाय जोँमाखौ; सानहाबनो लायो गोरबोआव बिरलांनाय थावनि फारसे दाउसिनखौ। 255 जारोम जारोम दुब्लिनि नाराखौ हानजासे मोसौआ सावलेदोँ; जारौ फैनाय फुंनि सानखौ नायहरना आं खुलुमदोँ। 256 लेवा मानफबनाय लामानि सेर सेर थिँ थिँ गोमोथिँ गाबदोँ, थाबायदोँ गुसु बाराव हार्सिँङै बुस्राव जाफबनाय गोसोआ खोमसियाव। 257 गावदां अखाफोरखौ नायहरो आं मिनिस्लु मोखांआव गोग्लैयो, खुलुमहरो गोथार साजायना गोरबोखौ। 258 दाखासे गोसोम जोमैया गेलेदोँ सेर सेर सोरां अखाफोरनि- गोमोदोँ गोसोआ नायहरो... 259 मेँहाबनाय देहा लानानै साजायबाय आं एमाव गोलांनो... थिँ थिँ गाबनाय गोमोथिँआ दान्दिसे हमथायो मेगनखौ। 260 गुसु सुहाबना देहायाव मानबायो, सिखारनो नाजाया जायो गोसोआ - दुंब्रुद एम नागारना। 261 गोरबोआव जाखांदोँ सानहाबनाय गोथौ आरो गोथौ- जिउनि लामा मिजिँआव। 262 दिनै सुदेम गुसु बाराव माबा बिरथिँफैयो रादाबा खोमायाव- होसोयो गोसोआ आथुरै। 263 गांखं फिस्रिनाय दाउसिनखौ नायहरो आं सानहाबना- निहोर सिजाना बिसोर सुहाबदोँ। 264 गुवार दुब्लि फोथाराव थं गसंना नायहरो- नुहरा गोजान साग्लोबदोँ खुवा खुवा। 265 दाखा दाखा जानाय हाद्रिया बाफबदोँ गोबा गोबा, हाद्रि लामानि बिखायाव - नायहरो आं दान्दिसे। 266 गोरबोआव आरोबाव सानहाबो हाद्रि बिरनाय महरै- खुवा खुवा बोहैदोँ निहोरा गोसोम (खानाय) खर'आव लासैनो फुरहाबो। 267 गुसु सुहाबनाय बिखायाव बिलिर फैयो बार, खुवा खुनाय दिनै फुंआव हांहाब थायो अरनि सेराव। 268 बिरलाङो दाउसिनफोर बिरलांफादोँ गोसोआ, हाजोनि हरै बारलांदोँ। 269 नैबे सिमां मुलुगाव आं सिमांजोँनो गेलेयो, सिमां, सिमां गाबज्रिनानै जेबो खुसियैनो। 270 बार बाराखै दा, बिबारफोरा मोसायाखै सिखिरिया बिरबायाखै- आंल' नायगोमाना दं। 271 आं ओँखारबोयो- जोमैनिफ्राय एब्रेनानै, मिनिसुलु खुसि बुहुमाव। 272 मोनसे सानस्रि नै गोसोनि- गोरबो बिखा मिलौनाय खुलुम हरो गसाइखौ। 273 अखाया बाज्रुमदोँ आंनि उखुम सिलायाव, बा! जोबोद रंजासुलि जोमै। 274 जारोम गलाब सानसुथिर समाव गाबदोँ गंस्रिना। 275 सिमां बियो सिमांनि थरथिँ थरथिँ मोदै- गाबदोँ फेलेँनि उनाव आरोबाव फेलेँ। 276 आंनि आथिँनि आगान खबामखौ, आं खोनायो मिजिँनि लामायाव। 277 आं जेरावबो गैया आं सानस्रियाव लोहाबदोँ- सानस्रिखनो हाया हाया। 278 फुंबिलिया जेब्लाबो मिनियो आंखौ लोगो हमना, मिथिँगाया नोँखौ बरायो। 279 आं माबोरै बुंनो हागौ दिनै आंहा गोजोन गैया, गाबोन फै रंजानो। 280 दोँबो मिनिसुलु आरो आं लाजिगुसु, जोँ सानैजोँ मोखांआव। 281 हार्सिँ आं, जेब्ला साना दोबैलाङो मोनाबिलिया फैयो, आं गोमो हाबो- रायज्लायो सुखु-दुखुनि बाथ्रा। 282 आं खुसियै रंजादोँ जोबोद गोजोनै, मिथिँगानि सुदेम बाराव। 283 आं गोदानसो सोरजियो गोजामखौ लानानै, आं सिमांखौ नागिरनाङा सिमांआ आंहा दंखायो। 284 आं मोनसे मुगा सोरजिगोन थुनलाइनि मुगा, जेराव दाङाबाजिनि खांनाय उखैनायनि बिथा गैया, नाख्रेबनाय सोमावसारनायनि बोराबनाय रागानि नोजोर गैया। 285 मिथिँगानि गुसु बारआ नै बिलिरफैदोँ आंखौ, रंजादोँ गोसोआ आंनि। 286 मिनिसुलुयो दान्दिसे गोसोआव रंजानायजोँ, समायना बिफां बिलाइ। 287 नायहरो दान्दिसे- दाउसिननि गारांआव, मिथिँगाया आंखौ गोबायो। 288 मिनिसुलु मिनिहरो साना मोनाबिलिया खुदुमो आंखौ। 289 मेगनाव साजायनाय जोबोद समायना मिथिँगाया, आं गोमोहाबो। 290 नोजोर नांनाय गोरबोआव मिथिँगा सिखोलानि मोजां मोन्नाय; आं हायना नाङो।